Gregorius Episcopus seruus seruorum Dei dilectis filiis ... majoris Ecclesie et... Sancti Thome Strigoniensis Prepositis, salutem et Apostolicam benedictionem. Sua nobis Newronius, et Anselmus laici peticione monstrarunt, quod, cum eis de Judaice prauitatis errore ad fidem conuersis orthodoxam dilectus filius... Abbas Sancti Martini de Monte Pannonie in quadam pecunie summa, et rebus aliis promiserit, quoad vixerint, annis singulis prouidere, prout in litteris suis perspeximus contineri, ipse id efficere denegauit. Vnde eidem Abbati nostris damus litteris in mandatis, ut dictis N. et A. iuxta promissionem suam sic liberaliter studeat prouidere, quod eos ad fidem Catholicam non peniteat accessisse, et nos deuotionem suam debeamus merito commendare Ideoque discretioni uestre per Apostolica scripta mandamus, quatenus si dictus Abbas mandatum nostrum neglexerit adimplere, vos eum ad id monitione premissa per censuram ecclesiasticam appellatione remota, preuia ratione cogatis. Datum Perusii VII. Idus Maji, Pontificatus nostri anno nono.

Jegyzet. Uriás ezen időben a pannonhalmi apátság kormányzását nem kezelte.

(Az eredeti után. Czech).