Innocentius Episcopus etc. dilecto filio B. Electo Neapolitano, Capellano nostro, Apostolice Sedis Legato salutem etc. Cum te pro sedanda discordia, que inter carissimos in Christo filios nostros... Ungarie et... Boemie Reges illustres suborta dinoscitur, ad partes illas, commisso tibi legacionis officio, destinemus, ut nichil tibi desit ad sedandam eandem, sed illius prosecutio in tuis manibus prospere dirigatur, relaxandi iuxta formam Ecclesie suspensionis et excommunicationis in quascunque personas, nec non et interdicti in loca Regnorum Ungarie et Boemie et partium vicinarum sententias, occasione huiusmodi discordie promulgatas, recepta debita satisfactione ab eisdem personis et locis, discretioni tue auctoritate presentium concedimus facultatem. Datum Laterani II. nonas Aprilis (Pontificatus nostri) anno undecimo.

(IV. Incze pápa Regestáiból, Theiner id. m. I. k. 227. l.)