Gregorius Episcopus servus servorum Dei carissimo in Christo filio ... Regi Boemie Illustri salutem et Apostolicam benedictionem. Paternum ad tue Celsitudinis incrementa morem gerimus, dum te ad ea, que saluti expediunt et honori tuo congruunt, sollicitis monitionibus invitamus: persvasiones itaque nostras devota mente suscipias, ad ea, que tibi benigne suggerimus, apertos habiturus oculos, et aures illis adhibiturus intentas; ut in rationis deducta secretum et ipsius examinata scrutinio admittantur devotionis et pressius (expressius) imprimantur: admissa et impressa fructificent, germinatura pacem et productura quietem; precidendo inimicitiarum causas et amicitias augmentando. Nosti, fili carissime, quod post varia et gravia guerrarum discrimina, quas inter te ac clare memorie Stephanum Regem Ungarie inimicus humani generis pacis impatiens excitavit: post graves ex eis hinc inde personarum strages, grandiaque rerum secuta dispendia, disponende pacis actore, inter te ac Regem eundem reformata concordia firmata sunt federa iuramenti et penarum adiectione, confirmationis nostre ad tuam et ipsius instantiam ac aliarum firmitatum robore confirmata, que idem Rex toto vite sue tempore dicitur observasse. Ceterum memorato Regi carissimus in Christo filius Latizlaus Rex Ungarie, ut tua novit sublimitas, in Regno successit: qui cum sit adhuc etatis innocentis, de nulla contra te potest offensa notari. Et cum ipsum filiis tuis uniat, sicut accepimus, sanuinis unitas, contra eum nulla tibi de futuro verisimilis potest esse suspicio, quam naturalis potius non solum excludere debet omnino coniunctio, sed et suspicantium corda ponere in tranquillo. Ad observanda igitur illi cum memorato genitore ipsius inita federa tanto efficacius tuam debet Excellentiam horum consideratio invitare, quanto iudicium est de preterito certius, ea per ipsum non esse hactenus violata, et de futuro verisimilius credi potest, nec imposteruni violanda. Adicit autem ad servande a te huiusmodi observationis instantiam: quia si quis in eodem genitore vel eius subditis forsan argui possit excessus, idem Rex L. ad emendationem cum debite satisfactionis promptitudine iuxta conventiones in federibus predictis adiectas dicitur esse votivus. Et quia nec gloriosum foret Celsitudini Regie, nec glorie Regali, magnificum in pupillum insurgere, aut etatem tam tenerani impugnare: ideoque Serenitatem Regiam monemus, rogamus et hortamur in Domino Jehsu Christo, in remissionem tibi peccatorum suadentes, quatenus predictas conventiones diligenter observans, ab omni memorati Regis L. suorumque offensa et iniuria studeas penitus abstinere, in boc non solum eiusdem Regis L., et carissime in Christo filie nostre Ysabelle consortis ipsius, nate carissimi in Christo filii nostri ... Regis Sicilie Illustris, etati defenens, sed ad eundem Regem Sicilie, virum quidem tante excellentie ac virtutis, cui Celsitudini tue utile fore credimus in sinceritate caritatis uniri, prout te decet; attendens, nostrisque monitionibus, que honorem etiam tuum respiciunt, cum tue Magnitudini congruat premissa servare, taliter acquiescens, quod ad tua commoda memorati Regis Sicilie animum attrahas, et apud nos proinde augmentum tibi favoris acquiras.

(Theiner id. m. I. k. 306. l.)