Nicolaus Episcopus seruus seruorum Dei nobilibus viris Bagerio Zach, Nicolao et Stephano filiis quondam Comitis Bagi, fratribus salutem et Apostolicam benedictionem. Speramus firmiter, quod vos tanquam fideles filii et devoti mentes vestras ad celestia desideria dirigentes, circa illa vos promptos et paratos exhibere curetis, que superno sint accepta conspectui, salutis vestre profectum respiciant et procurent fidei Christiane continuum incrementum Sane ad audientiam vestram credimus pervenisse, quam reprehensibiliter hactenus, quamque inhoneste, quinimo periculose se gesserit ... Ungarie Rex, qui vesanis adherens consiliis et a via veritatis exorbitans, Christiana religione postposita, se cum Tartaris, Sarracenis, Neugeriis, et paganis dampnate conversationis audacia fedus asseritur contraxisse; sumpta norma nepharia specialiter vivendi cum Neugeriis supradictis, ac turpiter et impudenter abiecta coniuge propria, Regalibus utique orta natalibus et honeste conversationis ac vite titulis insignita, videlicet carissima in Christo filia nostra E. Illustri Regina Ungarie, crudeliter seviens in se ipsum et domum Ungarie inclitam Regibus pollere Catholicis consuetam, thorum fedare non metuit coniugalem in grandem superne Maiestatis offensam, grave sue salutis dispendium et scandalum fidelium plurimorum. Nos autem equanimiter ferre talia et tam gravia non valentes, et cupientes per Apostolice Sedis providentiam oportunum super hiis Domino favente remedium adhiberi, venerabilem fratrem nostrum B. Episcopum Eugubinum, virum utique virtutibus insignitum ac nobis et fratribus nostris merito sue probitatis acceptum, ad Regnum Ungarie, commisso sibi plene legationis officio in eodem Regno, nec non Dalmatie, que Ungarie Regibus solet esse subiecta, Austrie, Styrie, Carinthie, Cumanie et Bosne partibus, tanquam pacis angelum destinamus, sibi per alias litteras nostra iniuncto, ut si Tartari, Sarraceni, Neugerii et pagani prefati suos conatus nepharios contra fidei orthodoxe cultores exercere presumpecrint, ne ipsorum crudelitas in eiusdem fidei dispendium invalescat, adversus eos et alios adherentes eisdem, vel ipsos in hiis quomodolibet confoventes, cuiuscumque preminentie, dignitatis, status aut conditionis extiterint, ac etiam contra hereticos, qui de diversis mundi partibus in nonnulis locis sue legationi subiectis, sicut asseritur, convenerunt, omnibus Christi fidelibus per regnum Ungarie supradictum ac alias dicte legationis partes per se, vel per alium seu alios verbum crucis sollicite proponere studeat, et ad eam promptis animis assumendam christianum populum exhortari. Rogamus itaque nobilitatem vestram et hortamur in filio Dei patris in remissionem vobis peccatorum iniungentes, quatenus diligenti meditatione recogitantes, quod per hoc posset Catholica fidei non modicum deperire, contra Tartaros, Sarracenos, Neugerios et paganos eisdem prefato Episcopo pro Divina et Apostolice Sedis ac nostra reverentia, cum super hoc et aliis etiam sue legationis negotiis ex parte ipsius Episcopi contigerit vos requiri, assistere, studeatis consiliis, auxiliis et favoribus oportunis, ut illorum dampnatis et repressatis erroribus et pravis conatibus penitus vacuatis, vobis exinde ex alto proveniat premium, quod pro piis actibus compensatur, nosque devotionem vestram uberibus in Domino laudibus attolamus. Datum apud Urbem Veterem X. kalendas Augusti. Pontificatus nostri anno tertio.

I. e. m. nobili viro Nicolao nato quondam Mauritii Comitis.

I. e. m. nobili viro Hugunino nato quondam Comitis Pause.

I. e.m. nobili viro Comiti Garduno.

(IV. Miklós pápa Regestáiból, Theiner id. m. I. köt. 365. l.)