Gregorius Episcopus etc. venerabili fratri... Episcopo Cumanorum, et dilectis filiis.... Cenadiensi et... de Bethleem Ultrasilvane Diocesis Prepositis, salutem etc. Olim venerabili fratre nostro... Episcopo Ultrasilvano deponente coram venerabili fratre... Episcopo Penestrino, tunc Apostolice Sedis Legato, contra... Abbatem et Conventum Monasterii de Clusa Ultrasilvane Diocesis duplicem questionem, unam videlicet super quibusdam decimis, et alteram super subiectione ipsius Monasterii, obedientia et reverentia, et aliis juribus episcopalibus, ad que ipsos sibi teneri dicebat; de quarum una scilicet super decimis ut Legatus, de reliqua vero ut delegatus ab Apostolica Sede cognovit: ac lite coram eo super hiis legitime contestata, et receptis de mandato ipsius quibusdam testibus ab eodem Ultrasilvano in utraque causa super principali productis, demum inter ceteras duas exceptiones, prescriptionem videlicet contra peticionem decimarum, et quoddam arbitrium latum per Albertum Orodiensem et quondam Petrum Albensem ac Florentinum Scibiniensem Prepositos, contra alteram, per quod pro ipso Monasteri decisum negotium dicebatur, ex parte predictorum Abbatis et Conuentus obiectas, idem legatus admisit. Sed antequam imponere finem negotiis potuisset, cum iam esset sue legationis terminos egressurus, tibi, frater Episcope, receptionem testium super prescriptionis exceptione premissa, et probationem per instrumenta super altera testium probatione, quo ad ipsam exceptionem arbitrii parti eorundem Abbatis et Conventus per interlocutoriam denegata commisit. Procuratoribus igitur partium in nostra propter hoc presentia constitutis, eodem Penestrino quibusdam Ecclesie Romane negotiis occupato, dilectum filium nostrum O. Sancti Nicolai in Carcere Tulliano Diaconum Cardinalem dedimus auditorem: coram 34quo dictorum Abbatis et Conventus proposuit procurator, quod impedimentis detentus legitimis nec exceptiones probare potuit supradictas, nec sufficienter instructus in assignato sibi termino comparere. Unde ad probandas exceptiones easdem tam per testes, quam per instrumenta, etiam non obstante predicta interlocutoria, de iure communi seu per beneficium restitutionis in integrum postulabat admitti; procuratore ipsius Ultrasilvani, quod id fieri non deberet, multipliciter respondente. Cum autem super premissis coram auditore prefato fuisset diutius altercatum, nos intellectis per fidelem relationem ipsius, que fuere proposita coram eo; attendentes neutram questionem ipsarum remissam esse sic sufficienter instructam, quod ad diffinitivam sententiam procedere valeremus, cum quedam ex attestationibus eiusdem Ultrasilvani in utraque causa receptis calumpniam paterentur, ex eo quod quidam testium predictorum recepti ab eo, qui potestatem recipiendi non habuit, extiterunt, et quorundam dicta fuissent per iam dicti Penestrini interlocutoriam reprobata, de quibus plene scire nequivimus veritatem; de utriusque partis procuratorum assensu mandamus, quatenus vocatis qui propter hoc fuerint evocandi, vobis depositiones receptorum testium exhiberi, et illas quas rationabiliter approbandas videritis, reprobatis reliquis appobantes, ac receptis probationibus, si quas partes de iure produxerint coram vobis, et auditis hinc inde propositis, utrumque negotium, si de partium voluntate processerit, iudicio vel concordia terminetis, ac faciatis, quod statueritis etc. Alioquin eadem negotia sufficienter instructa ad nostrum remittatis examen, prefixo partibus termino peremptorio, festo videlicet Beati Michaelis proxime futuro, quo cum actis, munimentis et rationibus suis compareant coram nobis iustas auctore Deo sententias auditure. Quod si non omnes, tu ea, frater Episcope etc. Datum Viterbii XV. kal. Januarii, (Pontificatus nostri) anno nono.

(IX. Gergely pápa Regestáiból Theiner id. m. I. köt. 141. l.)