Gregorius Episcopus etc. venerabilibus fratribus Archiepiscopis et Episcopis, dilectis filiis Abbatibus, Prioribus, Prepositis, Decanis, Archidiaconis, Archipresbiteris et aliis Ecclesiarum Prelatis in Bulgaria et Blachia constitutis salutem etc. Ratione preminentis officii, quod licet indigni disponente omnium conditore suscepimus, nobis quatuor facienda potissime reperimus, videlicet quod conversi (így) aliquando iuxta Domini iussionem fratres nostros in Divini timore et amore nominis ac reverentia Sancte Matris Ecclesie confirmemus, et in Principis Apostolorum navicula constitutos ad portum salutis duce Domino dirigentes, alios extra ipsam tanquam in invio positos, et in diluvium perditionis perpetue, nisi resumantur ad semitam, processuros ad ovile pastoris perpetui 67perducamus, nec non ut locum redemptionis nostre sanctissimum Redemptoris propitiante clementia per Ecclesie filios loberemus de manibus paganorum. Inde fit quod sollicite meditantes vos nobis in Christo karissimos in remotis haberi partibus, quo fit, ut spiritualis colationis alterne solacio personaliter refici nequeamus; quin imo, quod plures in huiusmodi locis existunt, qui predicte gremium Ecclesie contempnentes, ac turbantes corda fidelium in Romanie Imperio positorum, nec non quantum in ipsis est repugnaculum opponentes, quod reddi libera non possit Jerusalem civitas gloriosa, digne providimus, ut ad predictas partes venerabilem fratrem nostrum... Episcopum Perusinum, virum utique scientia et honestate conspicuum, Deo dilectum et acceptum nobis ac fratribus nostris pie vite studiis et evidentia multimode probitatis, concesso sibi plene legationis officio mitteremus: qui et vobis affectionem, qua vos in Christo complectimur affectuose, denunciet, et tandem hilaris in Domino rediturus, nos de vobis perfundat immensitate letitie, solita patri filiorum de obedientia provenire. Rogamus itaque universitatem vestram et obsecramus in domino Jesu Christo, in remissionem vobis peccaminum iniungentes, quatenus eundem Episcopum, immo personam nostram in ipso admittentes hilariter et condigna honoris plenitudine prosequentes, verba, que in ore suo posuimus, studeatis et aure devota suscipere et promptis affectibus adimplere, ei omne quod potestis consilium et auxilium in favorem credite sibi sollicitudinis, et super eo potissime tribuentes, quod, que prediximus Divine placita Maiestati, quantum in vobis est, annuente Christo proveniant, et delictus filius nobilis vir Assanus Dominus Bulgarorum et Blachorum circa Ecclesiam devotionis augmenta suscipiens, in defensionem Imperii memorati multiplicatis viribus invalescat, ab inferendo sibi discrimine desistente Vattacio, utinam per vigilantie nostre studium ad sinum Ecclesie superna suffragante clementia reddituro. Sic enim ibidem et per consequens in partibus orientis nomen Domini pro voto poterit exaltari, consequentibus vobis retributionis eterne premium, et a nobis nichilominus condigna opera gratiarum. Ceterum prefati Episcopi intendentes salubribus monitis et mandatis, eidem in securo conductu in eundo et redeundo, ac aliis necessariis 68sicut Legato Sedis Apostolice curetis liberaliter providere, preces nostras taliter impleturi, ut qui libenter honoramur in subditis, et vos in vestris honoremus temporibus oportunis. Datum Viterbii kal. Junii, (Pontificatus nostri) anno undecimo.

(IX. Gergely pápa Regestáiból Theiner id. m. I. k. 157. l.)