Reverendo et diligendo domino suo S(iboto) venerabili Augustensis Ecclesie Episcopo O(tto) Dei gracia Comes Palatinus Reni, Dux Bawarie debitum in omnibus obsequium et deuotum. Rumores, heu ueros lacrimabiles nimis et dolore plenos, uobis cogimur intimare, ut cognita quam uobis subscribimus tribulatione Christianorum, uestre ac subiectorum uestrorum saluti valeatis efficaciter precauere. Nouerit igitur paternitas uestra, quod quedam gens barbara Tartarorum, crudelis nimium, multitudinis infinite, de longinquis et ignotis partibus adveniens, cuius causam aduentus aliam ignoramus, nisi quod christianos uniuersos impie prosequantur et occidant, post innumerabiles strages christianorum, destructa terra Ducis Conradi terre Cracouie et filiorum suorum, militibus et popularibus occisis ibidem, nec non deuicto Duce Polonie, fines Regis Boemie hostiliter iam est adgressa. Ipse uero Rex Boemie cum uniuersis Baronibus ac popularibus terre sue crucesignatus, inuocato nostro et omnium amicorum suorum auxilio, maxima multitudine hominum collecta, cum ipsis congressurus Quasi modo geniti iter arripit. Qui si forte, quod Deus auertat, deuictus fuerit, destruccionem non immerito tocius Alemanie poterimus formidare. Exercitus autem hostium antedictorum protenditur in tres partes; primus videlicet versus Norwagiam, secundus Boemiam, tercius in Hungariam. Monemus ergo Paternitatem uestram in domino, et attencius hortamur, quatenus habito coepiscoporum uestrorum consilio super liberacione omnium Christianorum hoc tempore sitis solliciti ac taliter premuniti, ne apud districti judicis examen appareat, quod torpori aut negligentie uestre in hac parte ualeat imputari. Datum apud Strubingium III. Idus Aprilis.

(Hormayr után, Goldene Chronik von Hohenschwangau. II. oszt. 70. l. 11. sz. a. Czech.)