Alexander Episcopus etc. venerabili fratri... Episcopo Ultrasilvano salutem etc. Tua nobis fraternitas intimavit, quod pro eo frequenter Ultrasilvanam Ecclesiam debito Canonicorum obsequio defraudari contingit, quia ea ipsorum nequente necessitatibus providere, iidem ab altaris, de quo non possunt vivere, se subtrahunt debita servitute: super quo eidem provideri Ecclesie per Apostolice Sedis clementiam suppliciter postulasti. Nos itaque tuis precibus inclinati, ut ad augmentum Divini cultus ipsius Ecclesie redditus augmentare valeas, duas ecclesias seu capellas ad te vel Capitulum eiusdem Ecclesie immediate spectantes singulis ipsius prebendis de consensu dicti Capituli perpetuo annectendo, nec non et contradictores per censuram ecclesiasticam, apellatione postposita, coarctare auctoritate tibi presentium duximus concedendum: ita quod de debitis non fraudentur obsequiis, sed congrua ministris servituris perpetuo in eisdem de bonis ipsarum portio assignetur, ut animarum cura in eis, si forsan ipsis immineat, nullatenus negligatur. Nulli etc. nostre concessionis etc. Datum Laterani X. Kal. Maii. Pontificatus nostri anno tertio.

(IV. Sándor pápa Regestáiból, Theiner id. m. I. k. 235. l.)