Capitulum Ecclesie Jeuk (Jeuriensis?) vniuersis Christi fidelibus presentes literas inspecturis salutem in salutis largitore. Vniuersitati vestre declaramus presencium per tenorem: Quod Stephano filio Stephani de villa et generacione Chorna ex una parte, et Andrea filio Iohannis filij Osl ex altera coram nobis constitutis, idem Stephanus est confessus; quod medietatem terre Chalad, que ipsius porcionem iure hereditario immediate contingebat, cum siluis et omnibus aliis vtilitatibus suis, uicinam et commetaneam terre predicti Andree Chalad nominate, vendidisset prefato Andree pro decem marcis denariorum perpetuo possidendam, et ipsam summam pecunie dixit se ab eodem Andrea plenarie recepisse. Adiecit eciam idem Stephanus, quod Joan frater ipsius, et omnes alij consanguinei sui requisiti vendicioni predicte terre consensissent. Ceterum obligauit se idem Stephanus, vt si quispiam predictam terram ab eodem Andrea repetere attemptaret, ipse eundem suis sumptibus deffendere et expedire teneretur. Vt autem huius rei series robur perpetue firmitatis optineat, ad peticionem eiusdem Stephani predicto Andree presentes concessimus litteras nostri sigilli munimine roboratas. Anno gracie M° CC° L° septimo. Chepano Ecclesie nostre Preposito, Iurkone Cantore, Thoma Custude existentibus.

(Az eredeti után. Czech).