Nos Nicolaus Archidiaconus Nevgradiensis memorie commendantes significamus omnibus presentibus et posteris presentem paginam inspecturis: Quod Boht, sacerdos Ecclesie Sancti Michaelis Archangeli de Kezv et uoluntate et permissione filii (így) Ecclesie sue ex una parte; Karul uero patronus Ecclesie Omnium Sanctorum de Beren ex altera coram nobis constituti; idem Boht sacerdos dixit, de parochia sua quandam villam curui Johannis Beren uocatam per sacerdotem Ecclesie Omnium Sanctorum de Bereg (?, helyesben "Beren") contra iusticiam occupatam detineri; Karul uero illam dixit parochiam esse Ecclesie Omnium Sanctorum de Beren. Quod cum super hoc coram nobis diu fuisset questio ventilata, tandem postmodum dedimus scire ad fidem eorum, qua Deo tenentur, quibusdam sacerdotibus senioribus parochie nostre, scilicet Vicario nostro Ladomerio de Filek, Andre de Losuno, Endre de Dalan, Peuce de Chalan et Gregorio de Hvgog; si uilla curui Johannis, que dicitur Beren, ad Ecclesiam Sancti Michaelis Archangeli de Kezv iure pertineret, uel ad Ecclesiam Omnium Sanctorum de Beren. Qui postmodum ad nos redeuntes fideliter requisiti uiua uoce retulerunt, quod dicta uilla Johannis Beren uocata, ab antiquo esset parochia Ecclesie Omnium Sanctorum de Beren. Nos vero per uerba antedictorum sacerdotum sciendo ueraciter, predictam uillam Johannis Beren nuncupatam statuimus Ecclesie Omnium Sanctorum de Beren iure perpetuo possidendam; ita ut de cetero filii Ecclesie Sancti Michaelis Archangeli de Kezv, uel sacerdos eiusdem Ecclesie processu temporis racione sepe dicte uille Johannis nullam possint mouere questionem. Vt autem talis rei series sine obliuione uivat apud posteros, ad robur perpetue firmitatis presentes litteras sigilli nostri munimine fecimus roborari. Datum anno Domini M° CC° sexagesimo secundo.

(Eredetie a leleszi konvent levéltárában.)