Urbanus Episcopus servus servorum Dei venerabilibus fratribus universis Patriarchis, Archiepiscopis, et Episcopis, ac dilectis filiis Electis, Abbatibus, Prioribus, Capitulis, Conventibus et Collegiis Sancti Benedicti vel cuiuslibet alterius Ordinis, necnon Decanis, Archidiaconis, Prepositis, Archipresbiteris, et aliis Ecclesiarum Prelatis, ac Preceptoribus seu Administratoribus domorum Hospitalis et Templi ac Sancte Marie Theutonicorum exemptis et non exemptis, ad quos littere iste pervenerint salutem et Apostolicam benedictionem. Cum negotium terre sancte venerabili fratri nostro ... Archiepiscopo Strigoniensi, viro utique probate fidei et examinate virtutis in Regno Ungarie de fratrum nostrorum consilio duximus specialiter committendum, universitatem vestram monemus, rogamus et hortamur attente, per Apostolica vobis scripta districte precipiendo mandantes, quatenus ipsunt, immo potius nos in eo, ob reverentiam Apostolice Sedis et nostram in eundo, morando et redeundo suscipientes honore condigno, sibi extra suam Civitatem et Diocesim personaliter in predicto negotio laboranti pro se sexdecim equitaturis et vingintiquinque personis in necessariis, necnon in securo conductu providere curetis liberaliter et decenter: ita quod idem, quem nos et dicti fratres sue probitatis exigentibus meritis carum habemus multipliciter et acceptum, cum ad presentiam nostram, Deo dante, redierit, laudabile possit vestre promptitudini testimonium perhibere, ac nos exinde reddere in vestris utilitatibus promptiores: alioquin sententias, quas ipse per se vel per alios rite tulerit in rebelles, ratas habebimus, easque faciemus auctore Domino firmiter observari. Non obstantibus aliquibus Apostolicis indulgentiis seu privilegiis sub quavis verborum forma concessis, quibuscumque ecclesiasticis ordinibus, collegiis, universitatibus, vel personis, quod excommunicari, suspendi vel interdici nequeant, seu ad prestandas procurationes Legatis et Nunciis Sedis Apostolice coartari, sive quibuslibet aliis cujuscumque tenoris existant, que nulli suffragari volumus in hac parte, et quibusvis constitucionibus a predecessoribus nostris editis, seu consvetudinibus quibuslibet de procurationibus Nunciis dicte Sedis sub certis modis et condicionibus exhibendis. Datum apud UrbemVeterem Kalendas Octobris (Pontificatus nostri) anno tertio.

(IV. Orbán pápa Regestáiból, Theiner id. m. I. k. 246. l.)