Urbanus Episcopus etc. venerabilibus fratribus Archiepiscopis et Episcopis, ac dilectis filiis ceteris Ecclesiarum Prelatis per Ungariam constitutis, salutem etc. Terram sauctam, quam unigenitus Dei filius, dominus Jesus Christus in proprium sibi patrimonium et hereditatem elegit, conspicientes feritate diversorum infidelium immaniter lacerari, vias et modos desideranter exquirimus, quibus eidem terre possint opportuna presidia nostro ministerio provenire. Quare de venerabili fratre nostro. ... Archiepiscopo Strigoniensi, quem Dei timorem habere credimus et amorem, quique multiplicibus donis virtutum preditus, utiliter scit et valet, ubi labores impendit, plenam in Domino fiduciam obtinentes, predicationem crucis predicte terre subsidio in Regno Ungarie sibi per nostras litteras sub certa forma duximus committendam: cupieutes ut negotium ipsum in manibus eius eo plenius Divina clementia faciente proficiat, quo magis insidet cordi nostro, et quo maiorem necessitatem ad presens eidem terre novimus imminere. Ideoque universitatem vestram rogamus et hortamur attente, vobis nichilominus in remissionem peccaminum iniungentes, quatenus prefato Archiepiscopo et aliis, quos in hoc ipse cooperatores elegerit, circa ipsius negotii prosecutioneru ferventer assistere studeatis, habentes ipsum Archiepiscopum, immo potius nos in ipso, tamquam nobis intimum in eiusdem prosecutionem negotii favorabiliter in Domino commendatum; ita quod devotionem vestram commendare cum gratiarum actionibus merito valeamus, ac nichilominus exinde Divine retributionis vobis proveniat incrementum. Datum apud Urbem Veterem X. Kal. Novembris (Pontificatus nostri) anno tertio.

(IV. Orbán pápa Regestáiból, Theiner id. m. I. k. 251. l.)