Urbanus Episcopus etc. venerabili fratri ... Archiepiscopo Strigoniensi salutem etc. Cum nos dilecto fili nostro R. Sancti Angeli Diacono Cardinali sub certa forma nostris dederimus litteris in mandatis, ut venerabili fratri nostro... Episcopo Aquinati, qui ab Ecelesia sua per inimicos Romane Ecclesie fugatus experiri cogitur insolita incommoda paupertatis, pro se et quinque personis ac tribus equitaturis provisionem congruam iuxta sue dispositionis arbitrium ab Ecclesiis et monasteriis Ungarie exemptis et non exemptis, Cisterciensis et Sancti Damiani Ordinum dumtaxat exceptis, usque ad triennium per se vel alium faceret assignari, ac idem Cardinalis in tua provincia in centum et quinquaginta libris Turonensibus de speciali mandato nostro, vive vocis oraculo sibi facto, ab Ecclesiis ac monasteriis in eadem provincia constitutis usque ad triennium annis singulis ordinaverit dicto Episcopo provideri, descernens dictas centum et quinquaginta libras per te iuxta singulorum locorum facultates taxandas, et eisdem ecclesiis ac monasteriis proportionaliter imponendas, prout in eiusdem Cardinalis litteris plenius dicitur contineri: nos ipsius Episcopi supplicationibus inclinati, quod ab eodem Cardinale super hoc factum est, ratum et firmum habentes, fraternitati tue per Apostolica scripta firmiter precipiendo mandamus, quatenus predictas centum et quinquaginta libras prefatis ecclesiis et monasteriis per te vel alium iuxta statutum et ordinationem Cardinalis predicti imponens ac colligi faciens, eas predicto Episcopo vel eius nuncio pro ipso facias assignari. Contradictores etc. Non obstante, si aliquibus a Sede Apostolica indultum existat, quod suspendi, excommunicari vel interdici non possint per litteras sedis eiusdem non facientes plenam et expressam de indulto huiusmodi mentionem, vel qualibet alia indulgentia sedis predicte, per quam effectus preseutium impediri valeat vel differri, et de qua cuiusque tenore de verbo ad verbum oporteat in nostris litteris fieri mentionem, et constitutione de duabus dietis edita in concilio generali. Datum apud Urbem Veterem XV. Kal. Decembris. Pontificatus nostri anno tertio.

(IV. Orbán pápa Regestáiból, Theiner id, m. I. k. 252. l.)