Sanctissimus in Christo Dominus N. Summus Pontifex, pater patrum, cui universi orthodoxae fidei professores tenentur ad reverentiae promptitudinem singularem, venerabilem patrem, Episcopum N. (Philippum Firmanum) virum utique in spiritualibus providum, et in temporalibus circumspectum, tanquam imaginarium suae sanctae praesentiae pro negotiis Sanctae Matris Ecclesiae salubriter dirigendis, nec non ad fulcimentum vestri solii, et ad reparationem et reformationem status Regni Vngariae, et ad cultum ibidem Catholicae fidei ampliandum in vestrum favorem cum plenitudine potestatis duxit specialiter transmittendum. Eapropter Serenitatem Regiam rogamus et hortamur attente, Vobis tanquam singulari filio pleno persuadentes affectu, quatenus ob ejusdem summi patris reverentiam, nostrarumque precum intuitu, eidem Legato sic favorabiliter assistatis, quod suae legationis officium ad laudem Divini nominis, Ecclesiae Romanae decus, pacificum et tranquillum Regni Vngariae statum, nec non animarum salutem valeat Divina fevente gratia feliciter exercere; propter hoc euim sub vestro felici dominio Divini cultus reflorescet amoenitas, aeterna proemia redditura, Deusque felicibus vestris successibus jocunda adjiciet incrementa, et status Regni vestri per ipsius Legati ministerium in pacis et unitatis concordia exultabit.

(Bodmann id. m. 55. l.)