Nicolaus Episcopus seruus seruorum Dei venerabili fratri Lodomerio Episcopo quondam Waradiensi, Strigoniensi Electo, salutem et Apostolicam benedictionem. Ad utilem provisionem Strigoniensis Ecclesie, quam etiam totius Regni Ungarie proventura exinde, ut speratur, utilitas exigit, eo propensius pastoralis officii nos cura sollicitat, quo ad eam nun solum zelus excitat et conscientia urget instantius, sed illam et instantia sue nobis non ignote necessitatis exposcit. Novimus etenim, quod electionis de dilecto filio Nicolao Preposito Transilvano dudum in eadem Ecclesia celebrate cognitio, per varia subterfugia protracta diutius, utpote felicis recordationis Gregorii Pape X. nostri predecessoris inchoata temporibus et usque ad nostra deducta, eandem Ecclesiam diutine vacationis vexavit incommodis, attrivit iniuriis, et dispendiis immensis affixit, propter quod nos huiusmodi subterfugiis accomodis remediis iuri consonis occurentes, tandem electione ipsa de fratrum nostrorum consilio, iustitia exigente, cassata, et postulatione de venerabili fratre nostro ... Vesprimiensi Episcopo in eadem Ecclesia celebrata, non persone vitio, cum etiam cognitum plene de ipsa non fuerit, sed propter alias facti circumstantias non admissa, ne vacatio prolixior, quam verisimilis dissensio Strigoniensis Capituli et nonnula alia minabantur, graviora eidem Ecclesie ingereret detrimenta, hac vice provisionem ipsius Ecclesie Sedi Apostolice duximus reservandam. Verumtamen ad eam aliquamdiu procedere non sine causa distulimus, ut tempore dato ad informationem recipiendam de persona ipsius Ecclesie honori et oneri congruente, quanto maturius, tanto consultius, tantoque utilius iuxta nostra desideria Ecclesie provideremus eidem. Demum autem personis variis in nostre deliberationis scrutinium introductis, in te deliberationis ipsius exitus conquievit, et considerantes, quod sicut assertione fidedigna recepimus, vir es in consilio providus, in actibus strenuus, virtute pollens et fama, sicque in Waradiensi Ecclesia non solum fideliter, sed et utiliter ministrasti, ut super pauca fidelis, super multa constitui merearis, te a vinculo, quo eidem Warediensi tenebaris Ecclesie, de ipsorum fratrum consilio et Apostolice plenitudine potestatis duximus absolvendum, et ad dictam Strigoniensem transferentes Ecclesiam propter urgentem necessitatem, et evidentem utilitatem ipsius, te ipsi preficimus in Archiepiscopum et Pastorem, nihilominus ut ad eandem Strigoniensem Ecclesiam libere transeas, tibi licentiam concedentes. Illa sub spe Divine misericordie concepta de tua circumspectione fiducia, quod te ipsi Strigoniensi Ecclesie sic spiritualiter et temporaliter utilem exhibebis, quod illata sibi per diurnitatem vacationis dampua, Deo auxiliante, resarcies, deformata sue forma restitues, et deperdita restaurabis. Ideoque fraternitatem tuam monemus, rogamus, ei hortamur attente, per Apostolica scripta tibi mandantes, quatenus onus iniunctum devote suscipiens, eandem Strigoniensem Ecclesiam in spiritualibus et temporalibus diligentie tue commissam celeriter adeas, administrationem ipsius ad salutem populi tibi commissi et tuam sic in utrisque diligenter exerceas, et ipsius exercitium diligentius prosequaris, quod de talentis tibi a Domino creditis rationem in die stricti examinis redditurus illa multiplicata duplicato fenore committenti cum fiducia representes. Datum Rome apud sanctum Petrum Idibus Junii, (Pontificatus nostri) anno secundo.

(III. Miklós pápa Regestáiból, Theiner id. m. I. k. 337. l.)