Nicolaus Episcopus seruus seruorum Dei venerabili fratri ... Episcopo Firmano Apostolice Sedis Legato, salutem et Apostolicam benedictionem. Detulit ad nos fidedigna relatio, quod presentia dilecti filii Magistri Johannis Prepositi Budensis in Colocensem Archiepiscopum concorditer, ut fertur, electi est adeo in illius partibus oportuna, quod non expedit eum ad presens exinde avocari. Considerantes itaque, quod propter eius absentiam per nos adhiberi non posset, presertim circa personam ipsius, debite in talibus discussionis examen, negotium electionis de ipso in Colocensi Ecclesia celebrate fraternitati tue deliberavimus committendum; presentium tibi tenore mandantes, quatenus de prefati electi et electionis premisse meritis plene discusso, si eam inveneris canonice de persona ydonea celebratam, ipsam auctoritate nostra confirmes, faciens eidem Electo manus consecrationis impendi, et a suis subditis debitam obedientiam et reverentiam exhiberi; recepturus ab eo postmodum nostro et Ecclesie Romane nomine fidelitatis solite iuramentum iuxta formam, quam tibi sub bulla nostra mittimus interclusam. Alioquin eadem electione rite cassata, facias dicte Colocensi Ecclesie per eos, ad quos id pertinet, de persona ydonea ad eius regimen canonice provideri. Contradictores etc. usque compescendo. Formam autem iuramenti, quod ipse, si eius electionem contingat confirmari, prestabit, de verbo ad verbum nobis per eiusdem patentes litteras suo sigillo signatas per proprium nuntium destinare procures. Datum Rome apud Sanctum Petrum Idibus Junii, (Pontificatus nostri) anno secundo.

(III. Miklós pápa Regestáiból, Theiner id. m. I. k. 338. l.)