(C)apitulum Waradiensis Ecclesie omnibus Christi fidelibus presens scriptum inspecturis, salutem in uero salutari. Ad vniuersorum noticiam tam presencium quam futurorum tenore presencium volumus peruenire; quod magister, Stephanus filius Comitis Micaelis filij Vbul, personaliter pro se et ipso patre suo, ac fratribus suis, Petro scilicet et Paulo, sicut dixit, ex una parte; Georgius filius Symonis ex altera ad nostram accedentes presenciam, idem Georgius personaliter coram nobis constitutus, uiua uoce, sana mente, spontaneaque voluntate est confessus, quod porcionem in quadam terra sua hereditaria Mok uocata, in comitatu de Zathmar existente ipsum contingentem, que porcio. Deusteluke apellatur, sitam iuxta terram Comitis Mycaelis filij Vbul memorati; et uicinam Neugrad uocatam, cum omnibus suis utilitatibus, pratis scilicet et stagnis, ac pertinencijs vniuersis, dedisse, tradidisse et donasse, dicto Comiti Micaheli, et per ipsum suis heredibus, heredumque successoribus, inrevocabiliter, perpetuo possidendam et habandam pleno iure. Item quamdam particulam in eadem terra Mok, quam Marcello vendiderat similiter, dixit ipsi Comiti Mycaeli et filiis suis, ac omni posteritati sue perpetuo pacifice possidendam, pro eo, quod Comes Michael et filii sui prenominati questionem viginti marcarum ipsi supradicto Georgio dimisissent. Et insuper quartam dimidiam marcam (pro) predictarum terre particularum perpetuacione eidem Georgio persolverunt coram nobis; quarum particularum mete sic ordinantur, sicut partes ipse retulerunt. A parte septemtrionis scilicet iuxta quarumdam spinarum circulum est una meta terrea; de hinc accedit ad fluvium Zomus, et iuxta ipsum fluvium, parciendo uidelicet ipsum fluvium, uergit uersus orientem; et post seperando (így) se a dicto fluuio uersus meridiem uenit ad unam arborem piri curuam, ubi est meta terrea; dehinc adhuc uersus meridiem procedendo uadit ad unum maximum pratum per metas terreas consignatas, ubi sunt quedam arbores salicis; et dehinc per medium ipsius maximi prati procedendo uersus occidentem, iungit se ad terram Neugrad prefatam iterato, ubi mete dictarum particularum terminantur. Obligans se Georgius memoratus coram nobis, super preuia particula terre Deusteluke uocata ab omnibus, qui aliquam questionom super premissa particula terre contra Comitem Mycaelem uel filios suos seu quoslibet successores, suscitare niterentur, defendere ac expedire. Super autem alia particula, quam Marcello uendiderat, assumsit eodem modo sepe dictum Comitem Mycaelem et suos successores a quolibet pro ipsa particula quamcunque questionem mouere intendente et uolente, expediturum; Marcello, cui ipsa particula uendita fuerat, et filijs suis dumtaxat exceptis; relinquendo tamen dictas particulas semper ipsi Comiti Micaeli cum sua posteritate pacifice possidendas. In cuius rei memoriam ad instanciam ipsarum parcium presentes concessimus sigilli nostri munimine roboratas. Datum feria tercia proxima ante festum Beati Andree Apostoli, anno Domini Mş. CCş. LXX. nono. Domino Batur Preposito, magistro Iwan Cantore, magistro Benedicto Custode, Alberto Decano existentibus.

Jegyzet. A Kállay nemzetségnek bőrhártyára írott példányából másolta Horvát István. Érdy.