Nicolaus Episcopus seruus seruorum Dei, dilectis filiis Magistris Romano Huntensi et Angelo Nitriensi Archidiaconis in Ecclesia Strigoniensi salutem et Apostolicam benedictionem. Cum venerabilem (fratrem) nostrum Lodomerum, tunc Episcopum Waradiensem, Electum Strigoniensem a vinculo, quo Waradiensi tenebatur Ecclesie, absolutum ad Strigoniensem Ecclesiam, tunc pastore vacantem, de fratrum nostrorum consilio et Apostolice plenitudine potestatis duximus transferendum: nos de industria vestra confisi, pallium, plenitudinem videlicet pontificalis officii, ab eodem Electo cum instancia postulatum, de corpore Beati Petri sumptum, per vos presentandum venerabilibus fratribus nostris Philippo Firmano Apostolice Sedis Legato et Andree Agriensi Episcopis, ac per eos vel ipsorum alterum sub certa forma dicto Electo tradendum providimus destinandum; a vobis recepto de prosequenda fideliter presentatione huiusmodi juramento. Quocirca discretioni vestre per Apostolica scripta sub debito prestiti iuramenti mandamus, quatenus vos ad presentiam ipsorum Episcoporum personaliter conferentes, huiusmodi pallium, sicut premittitur, dicto Electo tradendum fideliter ipsis Legato et Agriensi Episcopo presentetis. Volumus autem, quod si alterum vestrum medio tempore infirmari, aut alias impediri, vel forte mori contingat, superstes nichilominus predictum pallium iuxta premissum modum presentet Legato et Episcopo memoratis. Quod si forte vos ambos, antequam presentatio huiusmodi fieret, de medio tolli contingat, providere curetis, ut pallium ipsum apud Cathedralem vel Religiosam Ecclesiam illius loci, ubi uos obire acciderit, fideliter deponatur, eisdem Legato et Episcopo iuxta formam vobis traditam, quam citius fieri potuerit, presentandum. Datum Rome apud Sanctum Petrum Nonis Maii, (Pontificatus nostri) anno tertio.

(III. Miklós pápa Regestáiból, Theiner id. m. I. k. 346. l.)