Martimus Episcopus seruus seruorum Dei venerabilibus fratribus ... Archiepiscopo Colocensi et Batiensi, ac ... Sirmiensi et ... Chanadiensi Episcopis salutem et Apostolicam benedictionem. Sicut dilecti filii Thomas Electus et Capitulum Waradiensem nobis significare curarunt, vacante dudum Waradiensi Ecclesia per translacionem venerabilis nostri fratris, Lodomerii Archiepiscopi Strigoniensis, tunc Waradiensis Episcopi, ad Ecclesiam Strigoniensem, idem Capitulum dictum Thomam, tunc Prespositum Ecclesie Sancti Michaelis de Castroferreo Jauriensis Diocesis, in eorum Episcopum canonice ac concorditer elegerunt, et tibi, frater Archiepiscope, tunc Electo Colocensi et Batiensi, loci Metropolitano, electione huius presentata, illam confirmari cum instancia petierunt. Sed venerabilis frater noster Philippus Episcopus Firmanus, in illis partibus Apostolice Sedis Legatus, asserens, quod idem Thomas Preposituram ipsius Ecclesie de Castroferreo post Genarale Concilium Lugdunense fuerat assecutus, et iuxta tenorem constitutionis in ipso Concilio edite per felicis recordationis Gregorium Papam X. predecessorem nostrum, ordinem presbiteratus non receperat infra annum, propter quod erat inhabilis ad huiusmodi confirmationis beneficium obtinendum, inhibuisse tibi dicitur, ne dictam electionem aliquatenus confirmares, sic que pretextu inhibitionis huiusmodi dicta Waradiensis Ecclesia vacationis incommoda compellitur experiri. Cum itaque, sicut asseritur, dicta Ecclesia de Castroferreo non Parochialis, sed Collegiata existat, ita quod ad Preposituram ipsam se dicta constitutio, que tantum de Parochialibus Ecclesiis et assumptis ad ipsarum regimen loquitur, non extendit, pro parte dictorum Electi et Capituli fuit nobis humiliter supplicatum, ut providere super hoc de benignitate Sedis Apostolice curaremus. Nos autem predicte Waradiensi Ecclesie, ne ulteriori vacationi subiaceat, paterna volentes sollicitudine providere, fraternitati vestre per Apostolica scripta mandamus, quatenus veris existentibus supradictis, tu, predicte Archiepiscope, cum eorum altero, si omnes hiis exequendis nequiveritis interesse, inquisita de modo electionis ac studiis eligentium, ac Electi meritis diligentius veritate, si dictam electionem inveneritis alias de persona ydonea canonice celebratam, auctoritate nostra confirmetis eandem, facientes a suis subditis eidem Electo reverentiam et obedientiam debitam exhiberi, ac nichilominus tu, prefate Archiepiscope, adiunctis tibi duobus vel tribus Episcopis, gratiam et communionem Apostolice Sedis habentibus, predicto Electo munus consecrationis impendas. Alioquin eadem electione rite cassata, extunc celebranda electio predicte Waradiensis Ecclesie ad eos, ad quos de jure pertinet, devolvatur. Datum apud Urbem-Veterem XIII. kalendas Julii, Pontificatus nostri anno secundo

(IV. Márton pápa Regestáiból, Theiner id. m. I. k. 350. l.)