In nomine Domini eterni Amen. Anno Incarnationis eiusdem millesimo ducentesimo octuagesimo secundo, indiccione decima, die tercio intrante Julii. Regnante Domino nostro Ladislao, Serenissimo Rege Ungarie; temporibus domini Johannis, venerabilis Spalatensis Archiepiscopi, domini Mladenni Stepconis de Briberio, Incliti Comitis, domini Viti Zerni Merge De Jadera egregii Potestatis; Joseb Petri, Madij Miche, Johannis Dabrali Judicum. Dominus Duimus Archidiaconus et sindicus Capituli Spalatensis, et ipsum Capitulum universum, ac dominus Georgius Abbas Monasterii Sancti Stephani, et dominus Alferius Abba Sancte Marie de Solta, et domina Stana Abbatissa Monasterii Sancti Benedicti, et Capellani ac universus Clerus Ciuitatis Spaleti omnes unanimiter taliter in scriptis a predicto domino Archiepiscopo appellandum duxerunt. Nos Duimus Archidiaconus et sindicus Capituli predicti et universum Capitulum, et Georgius Abbas Sancti Stephani, ac Alferius Abbas Sancte Marie de Solta, et Stana Abatissa Sancti Benedicti, et Capellani ac universus Clerus Ciuitatis, sentientes nos omnes in omnibus nostris iuribus et alijs causis quam pluribus per uenerabilem patrem dominum Johannem predictum Archiepiscopum nostrum communiter et specialiter agrauatos, ac ipsum plene cognoscentes in multis inepte et furiose procedere contra Deum et statuta sanctorum patrum, unde si nostrum ius contra ipsum prosequentes et defendentes ouiando sibi in suis prauis et ineptis ac injustis somniis et actibus contra nos comuniter uel in quemlibet specialiter uellet per aliquam sentenciam uel per aliquod mandatum iniuste procedere, Sedem Apostolicam in scriptis apelamus et apellatorias instanter unanimiter omnes et communiter petimus. Actum in palacio domini Archiepiscopi presente ipso domino Archiepiscopo et ibidem astante ac apellationem predictam diligenter ascultante, et presentibus nobilibus uiris Camurcio Petri, Martino Simonis, Thomasio Dusazze, Gaudio Calendi et aliis.

Ego Lucanus Dese examinaui.

Ego vero domnus Lucas Canonicus et iuratus Notarius Spalatensis hijs interfui, et ut in scriptis predicte apellacionis inueni et audiui, legi, rogatus scripsi et roboraui.

(A bécsi cs. k. titkos levéltárban őrzött hiteles másolat után.)