Ladislaus Dei gracia Rex Hungarie venerabili patri Lodomerio per eandem Archiepiscopo Strigoniensi, locique ejusdem Comiti perpetuo salutem et graciam plenam. Cum iuxta ordinacionem presentem, que vobis presentibus extitit celebrata, universis privilegiis sanctorum progenitorum nostrorum, Sanctissimi videlicet Regis Stephani, et Beati Regis Ladislai, nec non Regis Bele avi nostri, nobis per Abbatem de Bel exhibitis, prout in eisdem comperimus, duas partes tributi portus et fori de Camarun Monasterio Sancti Mauricii de Bel restituerimus, ut decebat; paternitatem vestram mandantes requirimus per presentes; quatenus, si Paulus et Nicolaus de Camarun, quibus super premissis littaras nostras transmisimus per magistrum Lorandum fidelem nostrum, rebelles extiterint nostrum mandatum contempnendo, vos contra eosdem procedatis, sicut expedit, ecclesiasticam per censuram. Datum in Erchy, tercio die Apostolorum Petri et Pauli, anno Domini MşCCş octuagesimo sexto.

(Eredetie a sz. mártoni főapátság levéltárában.)