Capitulum Jauriensis Ecclesie universis Christi fidelibus presentem paginam inspecturis salutem in Domino sempiternam. Ad universitatis vestre noticiam tenore presencium volumus pervenire, quod nobilis domina, domina Elisabeth, filia Jhoannis (így) de Zegh de genere Hunthpaznan, relicta videlicet Comitis Pangracii de Eurkyn, filiorum orbata solacio, et tuicione, ac defensione carens proximorum, coram nobis constituta personaliter, quia propter evidentem Regni perturbacionem se intolerabile honus dicebat sufferre paupertatis, nec commode poterat sustentare, se patrocinio Monasterii Beati Martini de Sacro Monte Pannonie ex fervore devocionis, et devote humilitatis affectu commisit, et possessiones suas universas, videlicet in Ech in vineis, quas post mortem dicti Comitis Pangracii, - - - racione dotis sue ad se dicebat devenisse, dedit et donavit predicto Monasterio perpetuo possidendas, eo scilicet modo, quod quamdiu eadem domina vixerit, abbas Monasterii sepedicti in alimentis et vestibus eandem decentibus ipsam tenebitur sustentare. Articulo huiusmodi eciam interposito et apposito, quod quicunque cognatorum, affinium, vel proximorum dicti Comitis Pangracii ipsas possessiones a dicto Monasterio voluerit revocare, pro quinquaginta marcis, que ad racionem dotis sepedicte domine debeant pervenire, easdem Abbas dicti Monasterii reddere teneatur, et pecuniam recipere pro sustentacione domine sepedicte. In cuius rei memoriam presentes concessimus litteras nostro sigillo roboratas. Datum in octavis Pentecostes, anno Domini Mş. CCş. octuagesimo sexto. Magistro Carachino Ecclesie nostre Preposito, Dominico Cantore, Hectore Lectore, Stephano Custode exstentibus.

(Eredetie a sz. mártoni főapátság levéltárában.)