Nicolaus Episcopus seruus seruorum Dei venerabili fratri ... Archiepiscopo Strigoniensi salutem et Apostolicam benedictionem. Dudum Romana Ecclesia per obitum felicis recordationis Honorii pape IV. predecessoris nostri vacante, Collegium Cardinalium ipsius Ecclesie, de quorum numero tunc eramus, tibi quasdam litteras destinavit, inter cetera continentes, qualiter dictus predecessor suas tibi dirigendas litteras confici fecerat et bullari; sed eo morte prevento, earum non fuerit missio subsecuta. Continebatur autem inter alia in ipsius predecessoris litteris supradictis, quod carissimus filius noster L. Rex Ungarie Illustris quasi alienatus ab utero Matris Ecclesie, in ipsius non expavens delinquere sacramentum, a carissima in Christo filia nostra E. Regina Ungarie Illustri consorte sua, non sine coniugalis thori feda violatione divertens, non solum infidelibus se copulavit mulieribus impudenter, verum etiam, ut liberius se fedaret cum illis, dictam Reginam carceri mancipavit, in quo subtracto sibi omni subventionis auxilio, idem Rex eiusdem Regine nobilitatis, quam ex Regali traxit prosapia, consideratione postposita, ipsam fame ac nuditate, subtractis sibi nichilominus aliis necessariis, affligebat, propter quod dicta Regina inter angustias maximas constituta, lacrimis irrigatur assiduis et suspiriis fatigabatur amaris. Unde prefatus predecessor ad dictam Reginam habeus paterne compassionis affectum, ac propterea cupiens optate respirationis et oportune consolationis sibi commoda procurare, ne, quod absit, ipsius innocentia inter squalores carceris deficeret fatigata, te attente rogabat, tibique dabat per dictas litteras in mandatis, ut sedulis studeres vigiliis eandem Reginam de carcere meroris educere ac restituere plenarie libertati, sibique faceres etiam omnia iura tam dotalia, quam alia iuxta consuetudinem Regni Ungarie hactenus in eodem Regno pacifice observatam impendi, contradictores et rebelles per censuram ecclesiasticam appelatione postposita, compescendo. Quia igitur eidem Regine super tam periculoso et miserabili statu eius affectu paterno compatimur, magnoque desiderio ducimur, ut ei post tante tribulationis nubilum serenitas votive consolationis accedat, fraternitati tue per Apostolica scripta mandamus, quatenus super premissis auctoritate nostra procedas, iuxta prefati predecessoris expressam superius continentiam litterarum, contradictores et rebelles per censuram ecclesiastcam appellatione postposita compescendo. Non obstante, si eidem L. Regi a Sede Apostolica sub quacumque forma vel expressione verborum indultum existat, quod excommunicari, aut quod terre ipsius interdici non possint per litteras dicte sedis non facientes plenam et expressam de indulto huiusmodi mentionem, aut quavis alia indulgentia sedis eiusdem, per quam effectus presentium impediri valeat vel differri. Datum Reate VI. Idus Augusti. Pontificatus nostri anno primo.

(III. Miklós pápa Regestáiból, Theiner id. m. I. k. 359. l.)