Elisabeth Dei gracia Regina Hungarie vniuersis presentes litteras inspecturis salutem in largitore salutis. Jus postulat et consentaneum fore dignoscitur racioni, ut quod cuiquam ex justis causis et titulis legitimis intervenientibus conceditur vel confertur, id solidum vel firmum debeat permanere, maxime cum aliquid in jus et proprietatem Sacrosancte Matris Ecclesie, que regenerat fideles in Christo, ex pia devocione traditur aut donatur. Proinde ad vniuersorum noticiam tenore presencium volumus pervenire, quod cum statu nostro erga Illustrem Principem, charissimum consortem nostrum, dominum Ladislaum tercium, Inclitum Regem Hungarie, per Dei misericordiam in melius reformato, et post congregacionem Regni Hungarie prehabitam circa Fuen, ad Comitatum Simighiensem personaliter accedentes, terras Reginales indebite, et superflue occupatas reambulari, et in jus Reginale revocari, et reduci fecissemus; Wesprimiensem nostram Ecclesiam Reginalem, cujus Presules pro tempore constituti Reginas Hungarie inungunt et coronant, et nos Reginale dyadema de manu venerabilis patris domini Pauli quondam Episcopi ejusdem Ecclesie recognoscimus recepisse, iuuenimus terram bochariorum, et pincernarum Reginalium in territorio magne ville Beren de Comitatu Simighiensi circa Sumberen constitutam, et eidem Ecclesie Wesprimiensi per nos traditam, et collatam ex tenore nostri privilegij, quiete et legitime ac racionabiliter ab antiquo tempore possedisse; reducentesque et in nostri memoriam ex animo reuocantes, ut non nostris excessibus prouenientibus, sed ex suggestione emulorum nostrorum iniqua, nobis apud Ecclesiam Beate Virginis de Insula Budensi per eundem dominum Regem Ladislaum in ergastulo carceris conclusis indigue, ex parte eiusdem Ecclesie Wesprimiensis in largicione, et collacione bonorum temporalium, tempore necessitatis nostre beneficia et donatiua recipimus infinita, ipsam terram de Beren, simul cum suis vtilitatibus, et pertinencijs vniuersis, vineis scilicet et alijs, ipsorum beneficiorum acceptorum in recompensacionem meritoriam et condignam, sicuti nostro privilegio continetur, eidem Ecclesie, scilicet ad vsum et proprietatem Prepositi et Capituli ipsius, primam donacionem nostram de eadem factam innovantes, retificantes et approbantes, denuo duximus presentis scripti patrocinio roborandam, et pariter confirmandam, mixtim cum alijs terris ejusdem Ecclesie in eodem territorio de Beren constitutis; omnibus populis Reginalibus de eadem terra Beren, mouere machinantibus questionem, auctoritate presencium perpetuum silencium inponentes. Vt igitur hujus nostre confirmacionis series robur optineat perpetue firmitatis, nec possit per quempiam hominum retractari, presentes litteras sigilli nostri appensione duplicis dari fecimus communitas. Datum per manus discreti viri Magistri Pauli Cantoris Budensis Ecclesie, aule nostre Vice-Cancellarij, fidelis nostri, anno Domini M°. CC°. octuagesimo nono.

(Robert Károly király 1323-ki megerősítő privilegiumából, mely őriztetik a veszprémi káptalan levéltárában.)