Nicolaus Episcopus seruus seruorum Dei venerabili fratri ... Episcopo Eugubino Apostolice Sedis Legato, salutem et Apostolicam benedictionem. Fide digna relatione, didicimus, quod in terra, que Alba Bulgarica litteraliter nuncupatur, Ecclesia quedam Episcopalis existit, que per quendam scismaticum, qui iamdudum in eam per quorundam nobilium scismati
corum partium illarum potentiam intrusus extitit, detinetur, quique suis nephandis erroribus circumstantem patriam inficere nititur, capellas erigendo de novo, et presbiteros ac clericos sui sequaces erroris ad eas ausu dampnabili ordinando, ac alia committendo nepharia, que oculos Divine Maiestatia offendunt, cedunt in fidei Christiane dispendium, et fidelium animos graviter scandalizant. Cum itaque tante perversitatis audaciam et tam execrabilis presumptionis ausum sustinere nolimus, sicuti nec debemus, fraternitati tue per Apostolica scripta mandamus, quatenus, prefato scismatico ab eadem Ecclesia auctoritate nostra per te prorsus amoto, alium virum fidelem et idoneum scientia, moribus et etate, de illis aut aliis partibus oriundum, de quo tua viderit expedire discretio, preficias eidem Ecclesie in Episcopum et pastorem, eique, adscitis duobus vel tribus vicinis Episcopis gratiam et communionem Apostolice Sedis habentibus, munus consecrationis impendas, recepturus postmodum ab eodem nostro et Ecclesie Romane nomine fidelitatis solite iuramentum sub forma, quam tibi sub bulla nostra dirigimus inclusam, sibique facias per te, vel per alium, seu alios a suis subditis debitam obedientiam et reverentiam exhiberi. Contradictores etc. Forma vero iuramenti, quod ipse prestabit, nobis per tuas et eius patentes litteras suo sigillo signatas per proprium nuntium quantotius destinare procures. Non obstante, si aliquibus a Sede Apostolica sit indultum, quod interdici, suspendi, vel excommunicari non possint per litteras dicte Sedis non facientes plenam et expressam, ac de verbo ad verbum de indulto huiusmodi mentionem. Datum apud Urbem-Veterem kalendis Augusti (Pontificatus nostri) anno tertio.

Forma iuramenti: Ego ... ab hac hora inantea fidelis et obediens ero Beato Petro San cteque Apostolice Romane Ecclesie, et domino meo Pape Nicolao, suisque successoribus canonice intrantibus etc. ut in forma usque Apostolorum limina singulis bienniis visitabo etc. usque in finem.

(IV. Miklós pápa Regestáiból, Theiner, Vetera Monumenta Historica Hungariam Sacram illustrantia I. köt. Roma 1859. 366. l.)