Nicolaus Episcopus seruus seruorum Dei venerabil fratri B. Episcopo Eugubino, Apostolice Sedis Legato salutem et Apostolicam benedictionem. Cum te ad Regni partes Ungarie, in quo, et in nonnullis aliis vicinis illi provinciis, commisso tibi plene legationis officio, fiducialiter destinemus, et intellexerimus, quod quondam ... Rex Ungarie de medio sit sublatus, nos ad carissimam in Christo filiam nostram E. Reginam Ungarie Illustrem, natam clare memorie Caroli Regis Sicilie, super doloribus et afflictionibus suis gerentes paterne compassionis affectum, volumus et per Apostolica tibi scripta mandamus, quatenus pro nostra et Apostolice Sedis reverentia Reginam ipsam habens propensius commendatam, benigne te gerere studeas circa eam, dotalitia et alia bona et iura ipsius manutenendo sollicite ac favorabiliter defendendo; illam in hiis efficaciam impensurus, ut predicta Regina tui favoris auxilium sibi sentiat profuturum, tuque proinde possis a nobis non immerito commendari. Ceterum volumus, ut de intentione ipsius Regine super mora sua in Ungarie partibus contrahenda, vel habendo inde recessu, diligenter conferas cum eadem, nobis, quod in hac parte inveneris, quantocius rescripturus. Datum apud Urbem-Veterem V. Idus Septembris, Pontificatus nostri anno tertio.

In e. m. venerabili fratri ... Archiepiscopo Strigoniensi. Nuper ad nostrum pervenit auditum, quod quondam ... Rex Ungarie de medio est sublatus. Nos autem ad carissimam in Christo filiam nostram E. Reginam Ungarie Illustrem etc. ut supra usque ad finem.

(IV. Miklós pápa Regestáiból, Theiner id. m. I. k. 368. l.)