Andreas Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie, Bulgarieque Rex omnibus Christi fidelibus tam presentibus quam futuris presens scriptum inspecturis salutem in Domino sempiternam. Cum benemeritis fauor debitus impenditur, et fideliter obsequentibus merces condigna redditur, Deus placari creditur, et subditi ad fidelitatis studia exercenda prouocantur, accendunturque spe et desiderio consequende retribucionis consimilis uel ecia(m) amplioris. Proinde ad vniuersorum noticiam tam presencium quam futurorum harum serie uolumus peruenire, quod Herbordus, Johannes et Rubynus filij Wytalis ad nostram accedentes presenciam, quandam terram Gothardi Rufi (sine) herede decedentis, ut dixerunt, Geru uocatam in Comitatu Castri Ferrei existentem a nobis petiuerunt sibi dari. Verum

quia de ipsius terre qualitate, quantitate, et utrum sit hominis sine herede decedentis, nec ne, nobis ueritas non constabat, fidelibus nostris Capitulo Castri Ferrei per nostras litteras dedimus in mandatis, ut ijdem unum ex se mitterent pro testimonio fidedignum, coram quo Dominicus filius Eguke homo noster conuocatis conmetaneis et uicinis reambularet ipsam terram et statueret Herbordo et fratribus suis iam dictis, si non fieret contradictum, contradictores uero, si qui fierent, ad nostram citaret presenciam, ad terminum conpetentem. Sciret eciam idem homo noster, utrum idem Gothardus sine herede decessit nec ne, et post hec tocius facti seriem nobis rescriberent seriatim. Quod quidem Capitulum demum nobis rescripsit, in hec uerba:

Excellentissimo domino suo A(ndree) Dei gracia Illustri Regi Vngarie, Capitulum Ecclesie Beati Michaelis de Castro Ferreo inclinacionem et oraciones in Domino cum perpetue fidelitatis obsequio. Litteras uestre Excellenc(ie recepimus cum) honore quo decuit reuerenter, in quibus uidimus contineri, quod unum ex nobis super faciem terre Gothardi Rufi Geru uocate, transmitteremus, cuius testimonio Dominicus filius Eguke homo uester, conuocatis conmetaneis et uicinis, reambularet ipsam terram, et statueret Herbordo et fratribus suis, si non fieret contradictum, contradictores autem ad nostram presenciam euocando; sciret et idem homo uester, utrum ipse Gothardus sine herede decesserit nec ne, quod uestre Maiestati rescriberemus. Vestris igitur perceptis mandatis nos in omnibus obedire cupientes, ut tenemur, vnum ex nobis transmisimus ad premissi negocii seriem exequendam, qui demum ad nos rediens diligenter per nos requisitus recitauit, quod idem Dominicus homo uester conuocatis co(nmeta)neis et vicinis eidem adiacentibus, videlicet Comite Markus filio Farcasij, ac populis de villa Hudaz, nec non homine magistri Johannis presentibus reambulauit prescriptam terram Gothardi Rufi Geru uocatam, qui sine herede decessit et statuit eisdem Herbordo et fratribus suis sub ueteribus metis et antiquis, coutradictore nemine existente. Datum in octauis Beati Johannis Baptiste.

Nos itaque, qui ex officij nostri debito metiri debemus merita singulorum, et unicuique iuxta exigenciam meritorum respondere, considerantes fidelitates et meritoria obsequia Herbordi et fratrum suorum predictorum, que in diuersis seruiciorum generibus, et specialiter iu conflictu nostro contra Albertum Ducem Austrie, Regni nostri (tunc) capitalem inimicum, habito, ubi ijdem Herbordus et Johannes in expugnacione Castri Boro uocati, letalia uulnera in suis membris sustulerunt, prout per relacionem Baronum nostrorum fideliter inibi existencium intelleximus, fideliter exhibuerunt, in recompensacionem eorum fidelium meritorum, quamquam pociora et ampliora mererentur, ipsam terram Geru uocatam, cum omnibus utilitatibus et pertinencijs suis vniuersis, dedimus, donauimus et contulimus Herbordo et fratribus suis memoratis, et eorum heredibus, heredumque suorum successoribus, iure perpetuo et irreuocabiliter pacifice possidendam et habendam, sub metis antiquis et prioribus distinccionibus terminorum. Vt igitur huius nostre donacionis seu collacionis series robur obtineat perpetue firmitatis, presentes concessimus litteras dupplicis sigilli nostri munimine roboratas. Datum per manus discreti viri magistri Theodori Albensis Ecclesie Prepositi, aule nostre Vice-Cancellarij dilecti et fidelis nostri anno Domini Mş CCş nonagesimo tercio.

(Eredetie a gróf Teleki család magyarországi ágának levéltárában Gyömrőn. Szabó Károly.)