A. B. C.

Vniuersis Christi fidelibus presentes litteras inspecturis Capitulum Ecclesie Posoniensis salutem in Domino. Ad vniuersorum noticiam tenore presencium volumus peruenire, quod domina Aglent, uxor Chama de Vruzvár, constituta personaliter coram nobis, quandam ancillam suam Annus uocatam, filiam Margarethe similiter ancille sue, tempore tradicionis sue secum adducte, presente eodem Chama marito suo et Endre filio Renoldi, qui pro se et pro Nicolao fratre suo comparuit, et eciam presentibus Kene filia sua, ac Thoma de eadem Vruzvar, marito ipsius filie sue consencientibus et permittentibus spontanea voluntate pro sue, parentumque suorum animarum remedio in nostri presencia manumisit et tradidit perpetue libertati in filios filiorum. Dans eidem et omni posteritati sue ubicunque et apud quoscunque uoluerit commorandi liberam facultatem, obligando se, quod quicunque processu temporum eandem Annus occasione condicionis pristine intenderet forsitan molestare, predicta domina Aglent tenebitur eam defendere et tueri propriis laboribus et expensis. Datum in festo Sancti Vrbani Pape, anno Domini M. CC. nonagesimo tercio.

(Hártya. Ugyancsak hártya szalagról lefüggő ép pecséttel. Pozsonykáptalani országos levéltár Capsa XIV. Fasc. 23. Nro. 3. Knauz.)