In Christi nomine Amen. Anno Incarnacionis ejus millesimo ducentesimo nonagesimo quarto, Indiccione VII., die Lune XXIX. Marcii. Providus vir Bugius Georgii syndicus et procurator nobilis viri domini Volzite Potestatis, Miligosti Saluonerii et Jacobi Drage Judicum, et Drusine Joannis, ac Tolislai Budislai Camerariorum Consilii et Communitatis Civitatis None, ad infrascripta specialiter constitutus, ut continetur in instrumento syndicatus facto anno Dominice Incarnacionis millesimo ducentesimo nonagesimo quarto, Indiccione VII., die XXX. exeunte Marcio, et scripto per manum Petri Nonensis Notarii, a me Antonio Judice et Notario infrascripto viso et lecto, nomine et vice dictorum Domini Potestatis, Consilii et Communitatis None, et pro ipsis omnibus solemni stipulacione promisit se facturum et curaturum omni excepcione et occasione remotis, quod nobilis vir dominus Georgius Comes Berberiensis tam suo nomine et suorum hominum, quam hominum et Communis Almisii, firma et rata habebit et tenebit, observabit et adimplebit omnia et singula pacta inita et firmata de treugua et super treugua Almisii per ipsum Comitem Georgium, ut supradictum est, cum egregio viro domino Rogerio Mauroceno Jadrensi Comite recipiente et stipulante vice et nomine Illustris domini Ducis Veneciarum, Communis et hominum Civitatis ejusdem, nec non et habitatorum, fidelium, subjectorum et districtualium suorum, scriptas et scripta per me Antonium quondam Rolanduzii de Bononia Imperiali et Prefectoria auctoritate Judicem et Notarium, anno et Indiccione predictis, die Dominico XXVIII. Marcii, et eidem Bugio syndico seriose et singulariter ac integraliter, per me jam dictum Antonium Notarium lecta et lectas, et non contrafaciet vel veniet aliqua racione, ingenio sive causa de jure vel de facto sub pena librarum duorum millium quingentorum denariorum Venetorum parvorum, solemni stipulacione promissa et obligacione omnium bonorum dicte Communitatis et hominum None mobilium et immobilium, presencium et futurorum. Acta et firmata fuerunt predicta sub logia magna Communis Jadre, presentibus dominis Volzina de Matafarto, Bogde de Lourethena, Michaele de Varicasa, Micha Ricario, et Gregorio dicto Gresco de Botone civibus Jadre, et aliis pluribus ad hec vocatis et rogatis.

Ego Antonius quondam Rolanduzii de Bononia Imperiali et Prefectoria auctoritate Judex et Notarius predictis omnibus interfui, et ut supra legitur, rogatus publice scripsi.

(U. o. III. köt. 70. l.)