Nos Ladislaus filius Magistri Nycolai Bani de Mead tenore presencium profitemur, quod bona deliberacione prehabita et consilio sapientum, attendentes fidelitatem ipsorum seruiciorum, Wolfgero et Nycolao Ebroni, et Andree et Mychaeli filijs Ebroni dicti Mendel de Mead, et omnibus heredibus ipsorum utriusque sexus, quedam bona sua in Mead, videlicet quatuor feoda et dimidium cum quibusdam agris, qui communiter Vber Mazze nuncupantur, et quandam partem sillue (így), et dimidium feodum suum in Mortunzzaben, contulimus nomine feodali, secundum terre Austrie iusticiam, libere et perpetue possidenda, sic quod per nos aut successores nostros in predictis feodis, scilicet agris et siluis, molestari non debeant vllo modo, aut in aliquo impediri; confirmantes eos in eisdem bonis, secundum quod actenus ipsam feoda cum suis antecessoribus a nostris progenitoribus tenuerunt, dantes eciam ipsis liberam potestatem vendendi et obligandi feoda supradicta, et disponendi ea ad vtilitatem ipsorum, secundum, quod necessitati eorum videbitur expedire. Et ne concessionem nostram in posterum aliquis hominum valeat infringere aut irritare, predictis fratribus filijs Ebroni dicti Mendel, et omnibus heredibus ipsorum presentes dedimus litteras sigilli nostri munimine roboratas. Datum in Mead anno Domini Mş CCş LXXXXş VI in die Margarete Virginis.

(Eredetie függő pecséttel a sopronyi városi levéltárban. Hatvani Mihály.)