Andreas Dei gracia Rex Hungarie fidelibus suis Abbati et Conuentui Saxardiensi salutem et graciam. Johannes, Rolandus et Paulus filij Baas, nobiles de Comitatu Tolnensi, ad nostram accesserunt presenciam, quandam terram Reginalem Egenzaraz uocatam in Comitatu Tolnensi existentem uacuam et habitatoribus destitutam, ut dixerunt, a nobis petiuerunt sibi dari. Et quia nobis de ipsa terra non constat, fidelitati uestre precipientes mandamus, quatenus mittatis hominem uestrum idoneum pro testimonio, coram quo Lampertus filius Moys de Duus homo noster accedat super faciem dicte terre, conuocatis conmetaneis et uicinis per ueteres metas et antiquas reambulando statuat filijs Baas antedictis, si non fuerit contradictum, contradictores uero, si qui fuerint, ad nostram citet presenciam ad terminum competentem. Et post hec qualitatem et quantitatem ipsius terre, nomina contradictorum, diem citacionis, et terminum nobis fideliter rescribatis. Datum Bude in festo Sancti Regis Stephani.

(A szegszárdi konvent ugyanazon évi jelentéséből. Szabó Károly.)