Nos Judices terrarum Comes Alexander, Comes Zochet, Comes Benete et Ozyas Archidiaconus Waciensis, constituti a domino Rege Bela in provincia Borsiensi, notum facimus omnibus presens scriptum inspecturis, quod yobagiones castri Borsiensis de villa Crusan, scilicet Pousa et sui consanquinei de eadem uilla, Abbatem Cosmam Ecclesie Beati Benedicti et yobagiones eiusdem Ecclesie coram nobis in causam traxerunt, dicentes, ut in uilla Cuachc, que est Sancti Benedicti, terram eorum hereditariam, ad duo aratra, uiolenter occupassent. Dictus uero Abbas cum suis jobagionibus eisdem contradicens nil juris illos in predicta villa habere asserebat, quod et priuilegio eiusdem Ecclesie coram nobis declarauit. Nos uero solo priuilegij non contenti testimonio, decreuimus, sibi prefato Abbati cum duobus fratribus suis, quos aduersa pars eligeret, super librum regularum Sancti Benedicti manus imponentes, sacramentum Deo prestare indiximus, et duobus jobagionibus dicte Ecclesie, super predicta terra stantes, et terram super capita eorum ponentes, juramentum adiudicauimus, qui eciam in die juramenti secundum nostram censuram manifeste sacramentum Deo prestiterunt, et suos adversarios, scilicet Pousam et suos cognatos iniuste dixisse cognouimus. Idcirco dictam terram sepedicte Ecclesie cum metis assignantes restituimus. Ne autem inposterum super hoe aliquis processu temporum lites ualeat excitare, ad preces sepefati Abbatis et jobagionum eius litteras presentes sigillorum nostrorum munimine roboratas concessimus. Anno uerbi incarnati Mş CCş XXXş VIş.

(Az eredeti után Knauz Nándor, Magyar Sion II. köt. 435. l.)