Bela Dei gracia Rex Vngarie vniuersis Christi fidelibus salutem in Domino Jesu. Digna remuneracione fidelitas dignis debet stipendiis a Regie Celsitudinis Serenitate refoueri, quatenus et humanum iusticie debitum impendatur, et retribucionis exemplo fidelium numerus augeatur. Hinc est, quod ad uniuersorum noticiam tenore presencium uolumus peruenire, quod nos seruicia et probitates dilecti ac fidelis nostri Oslu, Comitis, filij Oslu, que nobis et Regno indesinenter exhibuit, habentes pre oculis, et nolentes ipsum, sicut nec decet, suorum seruiciorum defraudari meritis, in recompensacionem sue fidelitatis et probitatum, terram Faad in Comitatu Soproniensi iuxta Charna, predium eorundem tam cum terra arabili, quam cum pascuis et feneto vsui triginta aratrorum competentem, quam prius ex donacione patris nostri digne promeruerat, contulimus iure perpetuo possidendam. Insuper filiis Belud Comitis bone memorie, qui similiter maximis et laudabilibus seruiciis coram oculis nostris et antecessorum nostrorum a primeuis etatis sue temporibus claruerat, concessimus de terra Widcha in eodem Comitatu, iuxta predium, quod uocatur Belud, iuxta Rabcha, ad quinque aratra, tam cum terra arabili, quam cum pascuis et feneto, ubi ijdem filij Belud habent domos et ecclesiam. Vt igitur hec nostre donacionis pagina firmum robur optineat in posterum, et nullis unquam temporibus ualeat retractari, duplicis eam sigili nostri munimine iussimus roborari. Datum anno gracie millesimo ducentesimo tricesimo octauo, sexto kalendas Januarii Regni autem nostri anno tercio.

(Eredetie bőrhártyán, melyről a pecsét elveszett, a budai kir. kamarai levéltárban.)