Bela Dei gracia Hungarie, Dalmacie, Croacie, Rame, Seruie, Gallicie, Lodomerie Cumanieque Rex omnibus Christi fidelibus presentem paginam inspecturis salutem in omnium Saluatore. Circumspeccio Regum prouida suorum fidelium seruicijs grato debet occurrere premio, ut alij ad exhibenda sibi seruicia et fidelitatem impendendam forcius inuitentur. Hinc est ergo, quod tam presentibus quam posteris harum insinuacione declaramus, quod nos Newer, Buda, Orcirad, Raschoh, Radila et Damaslou, homines Castri Trenchiniensis de villa Wetislou nomine, qui nobis in cabatis seruire consueuerant, pro eo, quod ijdem tempore persecucionis Tartarorum personas et res in obseruacione castri Trenchen exponere nullatenus dubitarunt, et nobis de maritimis reuertentibus armati, ut decebat, in exercitu contra Ducem Austrie habito seruicium exhibuerunt gratum et acceptum; pro eo eciam, quod in maioris fidelitatis argumentum nobis et Corone Regie se seruituros in armis militaribus assumpserunt, ipsos in jobagiones Sancti Regis Castri eiusdem simulcum hereditaria sua duximus perpetuo transferendos. Ita, ut de cetero tam ipsi, quam eorum successores inter jobagiones Castri memorati computabiles sine contradiccione habeantur, nec ulli unquam hominum racione condicionis pristine teneantur aliquatenus respondere. Et ne huius concesse libertatis status in posterum queat in irritum reuocari uel aliquatenus retractari, ad eius firmam stabilitatem litteras nostras concessimus dupplicis sigilli nostri munimine roboratas. Anno gracie millesimo ducentesimo qua dragesimo tercio IIII. nonas Junii, Regni autem nostri anno octauo.

(V. István királynak 1272-ki megerősítő privilegiumából a mélt. báró Mednyánszki család levéltárában.)