Nos Conuentus Fratrum Domus Hospitalis de Alba, et Magister Ambrosius Budensis Canonicus Generalis Procurator eiusdem Domus vicem Magistri Prouincialis gerens, significamus vniuersis presentes litteras inspecturis, quod accedens ad nos Ipolitus filius Cwk proposuit coram nobis uiua uoce, quod cum consensu cognati sui Pauli filij Tarka, qui eciam personaliter astitit, et idem affirmauit, totam terram suam, nec non fenetum, et locum molendini, ac omnem porcionem possessionis, quam habebat in Moha communem cum dicto cognato suo Paulo, seu diuisam et separatam ab eodem, vendidisset pro duodecim marcis argento Magistro Constantino Albensi Canonico metis undique antiquis assignatam, commetaneis in circuicione dicte terre undique comparentibus et non contradicentibus, sicut patuit nobis per hominem nostrum fidedignum super ipsam terram destinatum; precium eciam eiusdem terre dictus Ipolitus confessus est se totaliter recepisse, partim in rebus per viros idoneos estimatam, partim in argento. Obligauerunt insuper se, et sua bona, et suos heredes, Ipolitus videlicet et Paulus supradicti simul et in solidum, quod si processu temporis a Magistro Constantino ipsi possessionem totam, aut partem eiusdem quispiam requireret, ambo ipsi eam modis omnibus cum propriis expensis defendere et liberare tenebuntur; alioquin ipsam pecuniam, et totum valorem edificiorum, ac omnes alias expensas, quas interdum dictus Magister fecerit, eidem de alijs bonis eorum restituent, racione qualibet non obstante. Nos igitur ad peticionem et instanciam utriusque partis, quia proprium sigillum nostrum erat in maritima propter metum Tartarorum, litteras presentes sepedicto Magistro Constantino concessimus in testimonium et perpetuam firmitatem, fratris Juliani Custodis, fratris Lvce Preceptoris Domus nostre, et predicti Magistri Ambrosij sigillis communitas. Actum anno gracie Mş CCş XLş IIIş. Venerabili fratre Mikone de Buxunio Magistro per totam Hungariam et Sclauoniam existente.

(IV. Béla királynak ugyanazon megerősítő okmányából.)