Innocentius Episcopus servus servorum Dei venerabili fratri ... Archiepiscopo Prussie, Livonie et Estonie, Apostolice Sedis Legato salutem et Apostolicam benedictionem. Sicut omnes, quos extra archam invenit diluvium, perierunt, ita omnes, qui sunt extra communionem Ecclesie, nisi conversi ad ejus unitatem redierint, in eterne dampnationis supplicium deputantur. Hac siquidem consideratione inductus carissimus in Christo filius noster Daniel Rex Russie Illustris, cujus mentem Dominus, qui non vult mortem peccatoris, sed ut convertatur et vivat, sua misericordia illustravit, per litteras speciales et nuntios, quos propter hoc transmisit nuper ad nostram presentiam, cum humilitate ac instantia postulavit a nobis, ut ipsum et totam gentem ac Regnum ejus hactenus a fidei unione precisos, ad unitatem ecclesiasticam, et devotionem Ecclesie Romane, que aliarum omnium caput est et magistra, recipere de benignitate solita curaremus. Quoeirca monemus, quatenus personaliter ad partes illas accedens, si prefatus Rex in tam sancto proposito perseverans, tam ipse, quam Archiepiscopi, et Episcopi, et alii Magnates Regni sui scismate quolibet penitus abjurato, promiserint et juraverint, se de cetero in unitate fidei, quam Ecclesia Romana predicat et observat, ejusque Romane Ecclesie devotione perpetuo permansuros, 237eos auctoritate nostra et reconcilies, et tanquam speciales et devotos filius incorpores predicte Romane Ecclesie, que mater est omnium, unitati. Idque per loca et Regna, in quibus expedire videris, publices et facias etiam publicari. Datum Lugduni VII. idus Septembris. Pontificatus nostri anno quinto.

(Turgenev id. m. I. köt. 61. l.)