Nos Magister Andreas Prepositus Tytuliensis et totum eiusdem loci Capitulum omnibus Christi fidelibus presentem paginam inspecturis salutem in omnium saluatore. Quamquam a conditore generis humani omnes homines equo libertatis priuilegio sint gauisi, et pro iuris naturalis beneficio gaudere debeant; tamen secundum Juris Ciuilis statuta diuersi diuersimode ad seruitutes rediguntur, nonnulos eciam oblacio paterna conuersos facit et subiectos seruituti. Proinde ad uniuersorum noticiam harum serie volumus peruenire, quod accedens ad presenciam nostram Nemhyz de Babay, prestito coram nobis corporali sacramento asseruit et dixit presentibus procuratoribus Capituli Colochensis, videlicet Elia Archidiacono eiusdem loci, et Pousa presbytero, N. Decano et Jacobo Canonico, canonice et legitime institutis, quod filium suum nomine Felix obtulit ad altare Sancti Pauli tali adiecta condicione, quod quamdiu filius suus vixerit antedictus, officium pulsatoris debeat exercere. Sed predictus parens antedicti pueri videns, filium suum proficere in etate et genere litterature, posteritati proprie precauens, cum dilecta coniuge sua, matre predicti Felix, accessit et Capitulo Colochensi humiliter suplicauit, quod cum preciosior non sit nisi posteritatis libertas, obtulit consensu vxoris sue vltronea voluntate ac sine coaccione, possessionem suam, terram videlicet Babay nuncupatam in redempcionem seruitutis predicte. Et licet pre ualore possessionis pretaxate seruitus pueri memorati multo prestancior et validior habebatur; quia tamen ecclesiastice consueuit mansuetudini, oppressos a seruuitute exhimere, maxime illos, qui a nobilibus descenderunt, ipsam possessionem, ymmo terrulam, respectu seruitutis prenominate in presencia nostra sepedictum Capitulum in concanbium recepit seruitutis supradicte. Nos igitur vocati et rogati ad utriusque partis instanciam, ne super redempcione pueri, et super statu possessionis antedicte per quempiam materia dubij seu questionis possit generari, presentes concessimus litteras nostri sigilli munimine, et apposicione singulorum predictorum procuratorum suprascripti Capituli, ne falsitas preiudicet veritati, uel equitas subdatur iniquitati, eas duximus roborari et pariter consignari. Datum anno Domini Mş CCş Lş primo.

(V. István királynak 1369-ki megerősítő privilegiumából.)