Innocentius Episcopus servus servorum Dei venerabili fratri ... Archiepiscopo Jadrensi salutem et Apostolicam benedictionem. Petitio Pride mulieris Jadrensis nobis exposita continebat, quod condam Stephanus pater eius de voluntate ipsius, quod eam condam Pridano civi Jadrensi traderet, et idem civis, qui eam reciperet in uxorem, iuramento firmarunt; sed postmodum cum ipsa et dictus civis non consentirent ad invicem matrimonialiter copulari, dicta mulier eo vivente contraxit matrimonium per verba de presenti cum Prestantio laico Jadrensi, qui dicto civi quarta consanguinitatis linea attinebat, carnali copula subsecuta; quare dicta mulier nobis humiliter supplicavit, ut cum idem civis viam sit universe carnis ingressus, dispensare cum ea et dicto laico, quod non obstante publice honestatis iustitia possint in sic contracto matrimonio licite remanere, de benignitate Sedis Apostolice dignaremur. Quocirca mandamus, quatenus super hoc auctoritate nostra dispenses cum muliere ac laico supradictis, si aliud non obsistat. Datum Asisii idibus Julii, Pontificatus nostri anno undecimo.

(Theiner Ágoston, Vetera Monumenta Slavorum meridionalium historiam illustrantia I. köt. 80. l.)