Capitulum Posoniensis Ecclesie omnibus presentes litteras inspecturis salutem in Domino Jesu Christo, qui est salus omnium. Ad vniuersorum harum serie uolumus deuenire noticiam, quod Berweyno quondam Mayore preconum Castri Posoniensis ab vna parte, Bwd et Buhta, qui se dicebant fuisse de villa Monar, castrensibus, qui descensum dantes dicuntur Nicolao filio Terpuz, et Bacha filio Bache Comitis, jobagionibus Castri ex altera coram nobis constitutis, ijdem castrenses, Bwd scilicet et Buhta confessi sunt, quod cum ipsi dictum Berweynum coram Puero Curiali Comite Posoniensi traxissent in causam proponendo, ipsum quandam terram Castri Monar nomine inter terras Monch quondam Decani ex vna parte, et Musk castrensis ex altera iacentem indebite occupando detinere; idem Berweynus litteras domini Rolandi Palatini et Comitis Posoniensis coram eodem Curiali Comite exhibuisset, in quarum tenore satis expresse intellexisset contineri Curialis Comes memoratus, ut ipsam terram iure donatiuo Regio possedisset Berveynus memoratus; et eciam cum alie terre a Castro Posoniensi alienate per registrum domini B. Illustris Regis nostri Castro Posoniensi fuissent restitute, ipsa terra Monar apud eundem Berveynum ordine judiciario ab eodem Palatino et Comite Posoniensi prolata relicta fuisset; prout in litteris eiusdem Palatini eontinetur. Vnde predictus Puer Curialis Comes Posoniensis eosdem castrenses tanquam calumpniatores habuisset pro conuictis pro eo, quia ordine iudiciario litem propositam intrassent mouendo litis questionem. Et licet memorati castrenses ut calumpniatores in personis propriis fuissent condempnandi; tamen causa mutue dileccionis penam, quam pati debebant in personis, eisdem indulsisset Berveinus supradictus, saluo iure predicta terra Monar eidem Berveyno remanente. Nos igitur in huius rei testimonium ad peticionem utriusque partis litteras presentes concessimus sepedicto Berveino sigilli nostri patrocinio communitas. Datum in octauis festi Beati Johannis Baptiste anno Domini millesimo ducentesimo quinquagesimo tercio; Magistro Smaragdo Ecclesie nostre Preposito, Jacobo Cantore, Sixto Decano existentibus.

A B C D E

(Eredetie bőrhártyán, a hártyazsinegen fügött pecsét elveszett, a budai kir. kamarai levéltárban.)