Bela Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanieque Rex omnibus Christi fidelibus presentem paginam inspecturis salutem in omnium saluatore. Ad uniuersorum presencium posterorumque noticiam harum serie uolumus peruenire, quod cum nos terram Kezw, sitam in Comitatu Pestiensi, quam Conch, Petrus et Johannes, filij Johannis, hereditarie possederant, ipsis sine herede decedentibus, dilecto et fideli nostro Seywredo Comiti Albensi ob recompensacionem serviciorum suorum, que nobis et Regno nostro fideliter impendit et deuote, perpetuo contulissemus et donassemus possidendam, ac eam nostro priuilegio fecissemus communiri; postmodum ipsam terram Abbas Monasterij de Telky, et Woywoda ac Johannes filius ejusdem, Patroni Monasterij antedicti, ab eodem Seywredo Comite vepetierunt, in iudicio coram nobis dicentes, ipsam terram fuisse hereditariam ipsorum, et ob hoc ad ipsos iterum debere redire; Abbas quoque dicebat in eadem se partem habere racione Monasterij sui antedicti. Contra quos idem Seywredus Comes proposuit, quod terra memorata ad predictos Petrum et Johannem proprie et specialiter pertinuit ab antiquo, et a tempore cujus non extat memoria, predictorum Petri et Johannis progenitores, et ipsi solummodo per successionem ipsam terram tenuerunt et possederunt, absque participacione cujusquam. Nos ergo, auditis parcium proposicionibus, utrique parti probacionem duximus indicendam; sed cum probacio Comitis Seywredi esset longe superior et melior; decreuimus sentencionaliter, quod prefatus Comes Seywredus, una cum Egidio et Nicolao sacramentum super sua assercione prestare deberet coram Capitulo Waciensi. Qui in termino eis assignato, prout per litteras ejusdem Capituli Waciensis fuimus edocti, sacramentum prestiterunt, sicut per nos fuerat iudicatum. Vnde nos tocies dictam terram Kezw sepedicto Comiti Seywredo et ipsius heredibus heredumque successoribus per deffinitivam sentenciam adjudicauimus, predictis Woywode, filioque suo, et eorum successoribus, nec non Abbati tam preseuti, quam et qui pro tempore successerit, perpetuum super ipsa terra silencium imponentes; litteras super hoc nostras has dupplicis sigilli nostri munimine roboratas sepedicto Seywredo Comiti, et ejus successoribus perpetuo conferentes. Datum in Waska anno Domini millesimo, ducentesimo quinquagesimo quinto, Regni autem nostri anno vigesimo.

(Néhai Rajcsányi Ádám kézirati gyűjteményéből.)