Alexander Episcopus seruus seruorum Dei venerabili fratri ... Archiepiscopo Spalatensi salutem et Apostolicam benedictionem. Sua nobis Capitulum Sibinicensis Ecclesie in Sclauonia peticio monstrabat, quod cum olim Ecclesia ipsa pastore vacaret, ipsi, prout moris est, conuenientes in unum, Spiritus Sancti gratia invocata dilectum filium S. eiusdem Ecclesie Archipresbiterum, virum utique, ut asserunt, providum et honestum, ac in spiritualibus et temporalibus circumspectum, unanimiter et concorditer elegerunt in eorum Episcopum et pastorem. Verum quod tu, qui loci illius Metropolitanus existis, pro eo, quod Ecclesia ipsa tanto tempore vacaverat, quod ad Sedem Apostolicam erat eius provisio devoluta, renuisti electionem huiusmodi confirmare, predicti Capitulum ad Sedem ipsam habentes recursum, felicis recordationis I. Pape predecessoris nostri ad te litteras impetrarunt, ut inquisita de modo electionis, eligentium studiis, et electi meritis diligentius veritate, electionem ipsam, si eam inveneris de persona idonea canonice celebratam, non obstante vacatione diutina predicte Ecclesie, que vacasse per XX annos et amplius credebatur, confirmare curares. Sed tu ex eo solo electionem confirmare differens supradictam, quod in huius modi litteris predecessoris ipsius XX annorum et amplius spacium ponebatur, cum tibi plene constiterit, quod per amplioris temporis spatium Ecclesia vacaverit memorata, supersedisti hactenus negotio supradicto. Quare predicti Capitulum nobis humiliter supplicarunt, ut providere ipsis super hoc paterna sollicitudine curaremus. Nolentes igitur, quod ipsa Ecclesia propter vacationem diuturnam in spiritualibus et temporalibus graue dispendium patiatur, mandamus, quatenus, si est ita, hoc non obstante predictum S. Archipresbiterum, si tanto congruat oneri et honori, et aliud canonicum non obsistat, auctoritate nostra preficias eidem Ecclesie in Episcopum et pastorem. Datum Neapoli XII. kalendas Februarij, Pontificatus nostri anno primo.

(Theiner Ágoston, Vetera Monumenta Slavorum Meridionalium I. k. 82. l.)