Alexander Episcopus servus servorum Dei dilectis filiis ... Archidiacono et Capitulo Traguriensibus salutem et Apostolicam benedictionem. Licet continuata supervenientium negotiorum instantia nos, qui disponente Domino universali regimini quamquam insufficientibus meritis presidemus, insultibus impetat successivis, sollicitudo tamen omnium Ecclesiarum nostris incumbens humeris, tanto arctius quotidiana nos meditatione perurget, quanto ad id sumus specialius, immo principalius deputati. Cum igitur per litteras vestras, et etiam per dilectum filium Marcum Presbiterum, et Gervasium Diaconum, Canonicos vestros, quos de fidelitate et diligentia plurimum commendamus, nobis duxistis cum instantia supplicandum, ut Ecclesie vestre pastoris destitute solatio providere de Pontifice curaremus; nos volentes vestro satisfacere desiderio in hac parte, ac intendentes talem ibidem personam preficere, que plus suis meritis Presulatus dignitatem extollat, quam ipsa Pontificatus efferatur honore; venerabilem fratrem Columbanum Episcopum Traguriensem Penitentiarium nostrum Ordinis Minorum, virum utique litterarum scientia preditum, morum honestate et consilii maturitate preclarum, eidem Ecclesie preficimus de fratrum nostrorum consilio de potestatis plenitudine in Episcopum et pastorem, plena sibi tam in spiritualibus, quam in temporalibus ipsius Ecclesie administratione concessa; firma spe fiduciaque retenta, quod eadem Ecclesia per ipsius industriam auctore Deo augebitur in utrisque. Quocirca Universitati vestre per Apostolica scripta mandamus, quatenus ipsum tamquam patrem et pastorem animarum vestrarum, immo potius nos in eo benigne recipientes et honorifice pertractantes, impendatis ei reverentiam tam detitam quam devotam, eius mandatis et monitis salubribus intendendo humiliter et devote; alioquin sententiam, quam tulerit in rebelles, ratam habebimus, et faciemus auctore Domino inviolabiliter observari. Datum Anagnie IIII. nonas Julii Pontificatus nostri anno primo.

(Theiner, Vetera Monumenta Slavorum Meridionalium I. köt. 85. l.)