Nos Capitulum Ecclesie Sancti Michaelis de Castro Ferreo notum facimus tenore presencium vniuersis; quod constitutis coram nobis ab una parte Comite Paulo filio Comitis Secch de Saar, et Comite Barnaba filio Gerege ex altera; in possessionibus eorum hereditarijs tale inter se concambium fecisse retulerunt: Quod Comes Paulus prescriptus vniuersas porciones suas, quas habuit in possessionibus Fanchka, Kuzepfolw, Gekynus, Pynche, Pozuba vocatas cum omnibus vtilitatibus suis et pertinencijs vniuersis iuxta fluuium Saar uocatum dedit et reliquit ipsi Comiti Barnabe et ipsius heredibus heredumque suorum successoribus in perpetuum et irreuocabiliter possidendas; adeo plene, ut a dominio predictarum possessionum se et suos successores retraxit omnino. E conuerso uero idem Comes Barnabas similiter vniuersas porciones suas, quas dicebat se habere in possessionibus Mikche, Puclustelek, Laz, Dyenus et Santusy vocatis in partibus ultra Tychiam iuxta Berykiou cum omnibus vtilitatibus suis (et pertinencijs) vniuersis consimili modo reliquit prefato Comiti Paulo et suis heredibus perpetualiter possidendas. Hoc tamen interposito, quod partes coram nobis personaliter constitute taliter se in alteruterum obligarunt; vt si que parcium presens concambium non seruaret, et retractare uellet idem seu conaretur, non poterit, nisi centum marcis ante litis ingressum parti tacenti prius persolutis. In cuius rei memoriam firmitatemque perpetuam presentes concessimus litteras ad peticionem partis utriusque sigilli nostri munimine roboratas. Datum in quindenis Beati Michaelis Archangeli anno Domini millesimo ducentesimo quinquagesimo quinto. Magistro Bonauentura Preposito, Oliuerio Cantore, Ombud Custode, Mikou Decano Ecclesie nostre existentibus.

(A győri káptalannak 1280. körüli átiratából a budai kir. kamarai levéltárban.)