Nos Bela Dei gracia Rex Hungarie damus pro memoria, quod in causa, quam Ladizlaus et Thomas filij Pangracij de genere Chanad super metis et limitibus ac distinccionibus terrarum seu possessionem Berchem, Sunkulus, Thelegd et Zobolch vocatarum, et super tributo de Berchem contra Comitem Paulum filium Eachy movebant coram nobis, mediantibus Baronibus nostris, videlicet Mauricio Magistro Thauarnicorum nostrorum, Rorando Palatino, Rtephano Bano tocius Sclauonie, taliter concordauimus: Quod predictus Comes Paulus cum duobus filijs suis, scilicet Nicolao et Stephano, in octauis Sancti Georgij martiris coram Capitulo Waradiensi super sepulchrum Sancti Ladizlai Regis, tactis nihilominus Sacrosanctis Euangelijs, prestabit sacramentum super eo, quod prenominatas terras seu possessiones antedictorum Ladizlai et Thome filiorum Pangracij, sicut certo cercius sciuerit, vel scire poterit, certis metis et limitibus ac signis iuste et recte distinctas a terris et possessionibus suis coram Comite Belws homine nostro, et coram idoneo testimonio predicti Capituli, secundo die juramenti ad faciem predictarum accedendo restituet, remittet ac resignabit prefatis filijs Pangracij, sicut pater eorum possederat ab antiquo; pars autem de hac ordinacione resiliens centum marcas argenti parti aduerse composicionem predictam toleranti soluere teneatur, sicut se partes ad hoc obligarunt. Post hoc autem cursus metarum et distincciones ac limites terrarum predictarum in Capitulo registrentur. Datum in Oronos in octauis medij quadragesime.

(A váradi káptalannak ugyanazon 1257-ki bizonyságleveléből, mint alább.)