(B)ela Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanieque Rex omnibus presens scriptum inspecturis salutem in omnium saluatore. Solet Excellencia Regia annuere precibus suplicancium in licitis et honestis. Proinde ad vniuersorum noticiam harum serie volumus peruenire; quod Stephanus Banus Sclauonie et Capitaneus Styrie, dilectus et fidelis noster, in nostra presencia constitutus proposuit, vt terram Gurbuse filij Miconis, existentem in Comitatu Zaladiensi vltra Dravam, que ad manus ipsius Stephani Bani fuerat deuoluta, eo quod idem Gurbuse culpis suis exigentibus finiuit in patibulo vitam suam, contulisset Sceme filio Pouche seruienti suo pro suis seruiciis; hac interiecta condicione, vt idem Sceme, uel fratres sui, aut heredes ipsorum, quamdiu eis placebit, ipsam terram tenebunt pacifice et quiete; si uero sine liberis decesserint, predicta terra ad Stephanum Banum, uel ad heredes ipsius sine difficultate qualibet deuoluetur; si uero eandem terram Sceme prefatus uel fratres ipsius vendere voluerint, ipsi Bano uel suis heredibus vendere tenebuntur, et non aliis, iusto precio persoluto; donandi seu legandi in vita uel in morte, eidem Sceme, et fratribus suis ac heredibus ipsorum, potestate penitus interdicta. Mete eiusdem terre, sicut in litteris ipsius St. Bani vi dimus contineri, hoc ordinc distinguntur: Pvima meta incipit a fluuio Drawa, et vadit ad arborem populeam cruce signatam, sub qua est meta terrea; inde vadit ad aliam arborem populeam cruce signatam, sub qua est meta terrea; deinde vadit ad vivgultum, vbi est meta terrea sub arbore scilfa cruce signata; deinde vadit ad meridiem ad uiam, secus quam est meta terrea; deinde transit ipsam viam, peruenit ad curuam arborem ilicis in introitu silue existentem, super qua est crux, et sub eadem meta terrea; deinde vadit ad silvam ad arborem ihor cruce signatam, vbi crux ponitur pro meta; inde vadit ad aliam arborem ihorfa cruce signatam; inde vadit ad arborem gyrtian cruce signatam; deinde peruenit ad fluuium Plitiche, iuxta quem sunt due arbores egur et ilex cruce signate, sub quibus estmeta terrea; deinde per Pliticham vadit superius ad metas terre Opoy Comitis, ibique terminatur. Suplicauit igitur Stephanus Banus pro ipso Sceme, et cum ipso, vt premissa nostro dignaremur priuilegio confirmare. Cuius nos precibus inclinati presentes dedimus litteras duplicis sigilli nostri munimine roboratas. Datum per manus dilecti et fidelis nostri Magistri Smaragdi Albensis Ecclesie Prepositi aule nostre Vice-Cancellarij Electi Colocensis anno Domini millesimo ducentesimo quinquagesimo octauo, Regni autem nostri anno vicesimo tercio.

(Eredetie bőrhártyán, melyről a király kettős pecsétjének töredéke vörös-zöld selyemzsinóron függ, a budai kir. kamarai levéltárban.)