Alexander Episcopus seruus seruorum Dei venerabili fratri Aleardo Archiepiscopo Ragusino salutem et Apostolicam benedictionem. Recte tunc Ecclesiarum utilitati prospicitur, et indempnitati salubriter precavetur, cum discretis et prouidis cura committitur earundem. Unde Romanus Pontifex, cui ex Apostolatus officio imminet de uniuersis Ecclesiis sollicite cogitare, hoc maxime circa ipsas attendit, et ad id propensius invigilat, ut per bonos et dignos gubernentur rectores, per duces perspicuos in suis gregibus dirigantur, per sacros et eruditos ministros in spiritualibus fulgeant, et per dispensatores prudentes teraporalium proficiant incrementis. Sane a venerabili fratre nostro J. Archiecpiscopo quondam Ragusino Ecclesie Ragusine libera resignatione recepta, cum de ipsius Ecclesie ordinatione et populi Ragusini duritia cogitaremus attente, ad personam tuam ad eiusdem Ecclesie regimen propter multa favorabiliter assumendam intuitum considerationis nostre convertimus, sperantes, quod per datam tibi a Domino discretionem, consilii maturitatem, vite munditiam, religionis claritatem et litterarum scientiam apud populum ipsum dignum proficere debeas verbo pariter et exemplo. Unde te ipsi Ecclesie de fratrum nostrorum consilio et potestatis nostre plenitudine in Archiepiscopum preficimus ac pastorem, firmam spem fiduciamque tenentes, quod eadem Ecclesia et populus predictus tue diligentie studio spiritualia et temporalia, auctore Domino, suscipient incrementa. Quocirca mandanms, quatenus attendens, te in partem non modicam nostre sollicitudinis evocatum, sic iugo Domini, quod tibi per dispensationem nostram imponitur, humiliter subicias fortitudinis tue collum, de misericordia Dei et Apostolico favore confidens, quod exinde tibi proveniat in presenti meritorum gratia et premiorum gloria in futuro. Datum Viterbii V. idus Februarii, Pontificatus nostri anno quarto.

(Theiner, Vetera Monumenta Slavorum Meridionalium historiam illustrantia I. köt. 86. l.)