Bela Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanieque Rex omnibus Christi fidelibus presentem paginam inspecturis salutem in omnium saluatore. Regali dignum est et expediens, eis qui in seruicijs dominicis et obsequiosis famulatibus se exercent, munificencia gratulari; vt eo amplius ipsorum exemplo ceteri ad fidelitatis opera vehemencius inuitentur. Proinde ad vniuersorum tam presencium quam futurorum noticiam harum serie volumus peruenire: quod consideratis fidelitatibus et seruiciorum meritis Comitis Perchini nobis et Regni nostri gubernaculo succedentibus cum omni feruore fidelitatis, cum in deferendis rebus seu mercibus preciosis de Venecijs, non parcendo rebus nec persone, fideliter inpendit et deuote, ac pro rebus eiusdem C et XX marcis, quibus nos eidem Perchino tenebamur, quasdam terram seu possessionem Glaunicha vocatam, super quam Welezlaus et ceteri cognati sui residebant, que terra ad homines castri de Morocha pertinebat in Comitatu eiusdem existens, de munificencia Regia et consensu omnium Baronum nostrorum nobiscum assedencium, Archiepiscopis et Episcopis Regni nostri, consensu, eidem Comiti Perchino, et per eum suis heredibus, heredumque suorum successoribus jure perpetuo dedimus, contulimus et donauimus possidendam et habendam in filios filiorum suorum, nullo contradictore existente; cum omnibus vtilitatibus suis, metis, vineis, fenetis, siluis, montibus, aquis, locys molendinorum eidem tradidimus, et exceptam in seruicijs ipsos jobagiones a Castro de Morocha, et alijs castris omnino extractam. In cuius rei testimonium litteras nostras priuilegiales concessimus, vt robur perpetue firmitatis obtineat. Datum per manus Magistri Smaragdi Prepositi Albensis aule nostre Vice-Cancellarij, anno Domini Mş CCş LXş, Regni autem nostri anno vigesimo octauo.

(A székesfehérvári káptalannak 1329. in octauis Epiphaniao készűlt átiratából, „Magistter Andreas filius Comitis Merklini” kérésére, a budai kir. kamarai levéltárban.)