Conuentus Domus Hospitalis Iherosolimitani de Alba omnibus Christi fidelibus tam presentibus quam futuris presencium noticiam habituris salutem in Domino sempiternam. Vniuersitati Vestre tenore presencium declaramus, quod Johannes filius Pouce, et Benedictus filius Cyriaci de Lyula in nostra personaliter constituti presencia proposuerunt, quod de terra sua, quam comparauerant de relicta Comitis Jako, que eidem in dotem fuerat deuoluta, vnum fundum seu aream curie ad quantitatem vnius iugeris versus meridiem in eadem villa Lyula prope altarnicam ecclesie existentem, suo tantum iuri, nullo cognatorum suorum participante, pertinentem, ut dicebant, paulo post recessum Thatharice gentis in famis tempore vendidissent, Benke ciui Albensi pro una marca argenti purissimi iure perpetuo possidendam; et pecuniam confessi sunt recepisse ab eodem. In cuius uendicionis et empcionis memoriam et firmitatem pleniorem litteras concessimus presentes sigilli nostri munimine roboratas. Anno Domini M°CC° sexagesimo quarto, quarto nonas Januarij. Fratribus Ruscano Preceptore, Tesselino Ecclesie nostre Custode existentibus.

(Eredetie bőrhártyán, melynek pecsétje már elveszett, s főmélt. hg. Battyáni családnak levéltárában.)