Frater Petrus Diuina miseracione Magister Domus Hospitalis Sancti Stephani Regis de Strigonio et Conuentus eiusdem vniuersis Christi fidelibus presentes inspecturis salutem in omnium saluatore. Ad vniuersorum noticiam volumus peruenire, quod accesserunt ad nostram presenciam Martinus Abbas Sancti Benedicti de Goron ab una parte, et Symun jobagio Castri Strigoniensis de Neek ab altera; idem Abbas confessus est uiua uoce, quod communi voluntate fratrum et jobagionum svorum, terram et piscaturam Ecclesie sue de Kocoth sum suis vtilitatibus antedicto Symun et alijs hospitari volentibus contulisset; ita eidem et alijs ordinando libertatem, ut prefatus Symun situm curie et terram sufficientem pro uno aratro, non mensuratum, sed uno aratro sufficientem, habere possit, et annuatim duo pondera idem Symun et alij hospites super predictam terram residentes soluere tenerentur; et idem Symun hospites dicte Ecclesie protegere et defendere ab infestatoribus indebite teneretur, et terram sepedicte Ecclesie hospitibus super prefatam terram commorantibus, uel eciam superuenientibus, ordinare, et collocare, uel diuidere secundum iuris formam liberam haberet facultatem; ita uidelicet, ut sepedictus Symun, cuicunque uellet relinquere post decessum, secundum ordinem libertatis, siue consanguineo, siue alijs, nullo contradicente relinquere possit. Et ut hoc ut firmum et ratum habeatur, ad instanciam utriusque partis nostras dedimus litteras sigillo nostro roboratas. Datum anno Domini M°CC° sexagesimo octauo.

A B C

(Eredetie bőrhártyán, melyről a vörös-sárga selyemzsinóron függött pecsét elveszett, a budai kir. kamarai levéltárban.)