Capitulum Ecclesie Strigoniensis omnibus Christi fidelibus presentes litteras inspecturis salutem in Domino. Ad vniuersorum noticiam tenore presencium uolumus peruenire, quod nobilis vir Comes Dyonisius filius Beke, unacum fratre Michaele monacho de Conuentu Monasterij Sancti Benedicti iuxta Granam, in nostri presencia personaliter constitutus, terram suam, quam dixit se habere in terra Barbata uocata, iuxta terram predicti Monasterij, quam a filijs Hysce asseruit se emisse, dedit, tradidit et donauit coram nobis pro remedio anime sue, predicto Monasterio perpetuo possidendam. In cuius rei testimonium et memoriam ad peticionem eiusdem Dyonisij Comitis, presentes nostras concessimus litteras, sigilli nostri munimine roboratas. Datum per manus Magistri Sixti Lectoris Strigoniensis, anno Domini millesimo CC°LX° nono, secundo idus Maij.

A B C

(Az eredeti után Knauz Nándor, Magyar Sion III. köt. 57. l.)